Проф. д-р Ѓикиќ, научник од светски глас, порачува: Тестирајте што повеќе луѓе, следете го примерот на Јужна Кореја! (ВИДЕО)

„Тестирајте, тестирајте, тестирајте. Што повеќе тестирања имаме, толку повеќе знаеме за болеста, имаме предвидувања за она што се случува во широката популација. Што се случува во Хрватска, зошто Штабот повикува да се тестира по нивните правила, не знам, но апелирам да се тестира што повеќе“.

Оваа е изјава која за хрватските медиуми ја даде проф. д-р Иван Ѓикиќ, еден од најуспешните светски научници кој потекнува од нашиот регион, од Хрватска. Тој е молекуларен биолог, директор на Институтот за биохемија на Гете универзитетот во Франкфурт. Во овој момент, тој и неговиот тим работат на базични научни истражувања на природата на коронавирусот, кои можат да помогнат за создавање вакцина.

Ѓикиќ е емотивно и професионално поврзан со Хрватска и тој му предложи на хрватскиот  кризен штаб осум чекори во оваа критична фаза на борбата против коронавирусот. Покрај мерките за изолација, овој научник се залага за повеќе тестирање.

„Светската здравствена организација препорачува интензивирање на мерката тестирање и навремено откривање нови случаи. Набавката на нови инструменти и отворање што повеќе акредитирани лаборатории ширум Хрватска мора да биде приоритет на сегашните вложувања“, вели Ѓикиќ, пренесува 24 sata.hr.

И во едно друго интервју Ѓикиќ инсистира на масовно, но организирано тестирање, со отворање на што повеќе акредитирани лаборатории, зашто тестирањата треба да се вршат според утврдени критериуми и податоците да се собираат на едно место. Но, нема дилеми дека за овој научник што помасовното тестирање е еден од условите за успешна борба против вирусот.

Зборувајќи за релативно добрите резултати на Германија, Ѓикиќ во едно интервју објаснува дека тоа се должи на големиот број тестирани граѓани во таа земја, како подготовка за борбата, која подразбира изолација, спречување на контактите и спречување на ширење на вирусот во ризичната популација, повозрасните лица и хорнично болните.

Што се однесува до Германија, како што пишува jutarnji.hr, Германците не се целосно задоволни од својата досегашна борба и се подготвуваат да ја воведат стратегијата на Јужна Кореја, која се темели на што помасовно тестирање и сместување на заболените во карантини. Во Германија сега се спроведуваат меѓу 300.000 и 500.000 тестирања неделно, двојно повеќе од Франција. Но, документ на германското Министерство за внатрешни работи, што го објавиле некои германски медиуми, открива дека владата на Ангела Меркел предвидува фантастични 200.000 тестирања дневно. Во Германија сега се тестираат лица биле во контакт со лица со позитивен тест, а во иднина ќе можат да се тестираат сите оние што мислат дека се заразени и кои можеби биле во контакт со заразени лица.

За примерот на Јужна Кореја порталот Плусинфо веќе пишуваше. И проф. д-р Ѓикиќ, научник од светски глас, кој работи и живее во Германија, ја истакнува токму на Јужна Кореја како „најдобар пример како може со правилно тестирање да се намали штета врз економијата и врз луѓето и да се помине низ таа криза на еден поблаг начин“.

Ова тој во вели во подолгото и ексклузивно интервју за еден босански медиум, што на својата ФБ страница го препорачува и македонскиот епидемиолог д-р Драган Даниловски. Во ова интервју Ѓикиќ зборува и за позитивната вест дека коронавирусот има само 4 до 8 дополнителни мутации, што значи дека штом ќе се создаде вакцината, таа ќе дејствува поделотворно одошто вакцината против обичниот грип, на пример.

Oколу 60 отсто од луѓето заразени со вирусот го преживуваат без симптоми, вели тој, додека само 20 отсто, главно постари луѓе и хронично болни, имаат потежок облик на болеста. Но кај нив, пак, смртноста е многу висока. Кај вирусот ебола смртноста е 80 отсто, објаснува научникот, но она што го прави ковид-19 толку многу опасен е фактот што е непредвидлив и што многу брзо се шири.

– Oвој вирус е опасен затоа што не го познаваме, немаме лекови, немаме вакцина, единствено што имаме се правилни епидеомиолошки мерки, со чија помош можеме да го блокираме ширењето на вирусот – објаснува проф. д-р Иван Ѓикиќ.

Секоја земја за себе е уникатна, но борбата против вирусот, барем во Европа, мора да биде заедничка, вели тој и порачува:

– Мораме да ги споделиме искуствата, не само тука во регионот на бивша Југославија, туку и во Европската Унија. Здравствените системи мора да бидат флексибилни и да ги менуваат препораките, за на тој начин најефикасно да се борат во локалните средини – порачува овој научник од светски глас.

Погледнете го целото интервју: