Проданоски: Нема да дозволиме Зоран Заев да тргува со 650 паднати борци и народни херои од Прилеп

Малку им беше продажбата на името со Грција, па сега тргуваат со најсветото. Особено за нас Прилепчани, а тоа се нашите борци од народноослободителната борба. Се тргува со илјадници знајни и незнајни херои кои својот живот го положиле за борбата против бугарскиот фашистички окупатор и придонесле за слободата на Македонија, рече на денешниот протест во Прилеп Дејан Проданоски, претседател на ОК на ВМРО-ДПМНЕ Прилеп

– Еве денеска прашувам оттука каква е таа администрација која брутално и крвнички погубила 18-мина во масакрот кај „Дабница“. Од кого биле убиени народните херои Орде Чопела, Кире Гаврилоски, Борка Талески, Мирче Ацев, Кузман Јосифоски Питу и другите 650 жртви колку што дал Прилеп во НОБ.Дали според нив загинале залудно борејќи се за својата држава? За жал, за власт ништо не е свето. Таа гази се. Затоа заедно сплотени да им кажеме доста е! Доста е со распродажбата на нашиот идентитет, јазик, култура, традиција – рече Проданоски.

Според него ВМРО-ДПМНЕ која својата идеологија ја темели врз вековната борба за слобода нема да дозволи Прилеп да биде понижен.

– Прилеп е град херој и како таков ќе остане, бранител на светите идеали за свои на своеото.Го повикуваме секој добронамерник да не поддржи, да го крене својот глас. Сега не е време за партиски прекупукувања и поделби. Сега е време за сплотеност, да се избориме заедно оваа власт да падне- рече Проданоски.