ПРЕПОЗНАЕНИ СМЕ КАКО НАЈДОБАР ПРИМЕР ВО ЕВРОПА, СУБВЕНЦИИТЕ ДОНЕСОА УСПЕХ! Николоски за растот во туризмот од 40% што го констатира Светска банка
Продолжуваме во следниот период со уште повеќе инвестиции во авиосообраќајот и туризмот - вели вицепремиерот и министер за транспорт.
Извештајот на Светска банка, според кој Македонија е со најголем раст на авиолетови и туризам во Европа и Централна Азија, е мотив за уште поголема работа и посветеност, вели вицепремиерот и министер за транспорт, Александар Николоски, во објава на Фејсбук.
– Македонија забележува рекордна статистика во растот на туризмот преку авиосообраќајот во услови на светска криза, исклучителен успех што е препознаен од страна на Светска банка. Успехот и растот на авиосообраќајот во Македонија е нотиран во анализата на Светска банка за раст на туризам. Со раст од 40% на годишно ниво, Македонија е препознаена како најдобар пример за држава со најголем раст во патници на пристигнување во Европа и Централна Азија. Со мерката за субвенционирање на нови авиолинии и успесите што ги постигнуваме, Македонија е позиционирана на врвот во привлекување нови туристи и придвижување на економијата преку туризмот – рече Николоски.
Овие успеси се потврдуваат и преку работата на охридскиот аеродром каде само во еден ден опслужени се рекордно преку 3 илјади патници, што за аеродром од овој тип е огромен успех.
– Продолжуваме во следниот период со уште повеќе инвестиции во авиосообраќајот и туризмот – вели вицепремиерот и министер за транспорт.