ПРЕЛЕЖАНИ ОД КОВИД СЕ ЖАЛАТ НА ЛОШ СПЕРМОГРАМ Дали корона вирусот предизвикува машка неплодност?

Студија објавена во списанието Репродукција наведува дека потешките форми на болеста ковид-19 имаат последици врз квалитетот на спермата, што исто така може да влијае на плодноста. Студијата ги обезбедила првите директни докази дека инфекцијата со корона вирусот влијае на квалитетот на спермата и на репродуктивниот потенцијал на мажите.

Сепак, многу експерти кои не учествувале во студијата се воздржаа од толкување на овие податоци, наведувајќи дека не станува збор за директен доказ, туку само за асоцијација. Тие посочуваат дека секоја вирусна инфекција може привремено да предизвика пад на бројот на сперматозоиди (понекогаш и до нула) во период од неколку недели или месеци. Затоа е тешко да се утврди дали ова намалување е последица од корона инфекцијата или само честа и минлива последица на болеста.

И доктор Слободан Лазаревски од „Аџибадем Систина“ вели дека спермограмот е динамична категорија и дека кај секој маж тој може еднаш да е одличен, за после 2-3 дена да биде далеку под нормалните параметри.

– Не може кај мал примерок да се донесат заклучоци кои би имале научна тежина. Јас сега правам една проспективна анализа која ќе трае една година на ИВФ пациентки, а се однесува на квалитет на сперматозоиди, јајни клетки и исход на бременост кај прележани, вакцинирани, вакцинирани и прележани и ниту едно ниту друго. Има некои првични иследувања (од Германија) дека и вакцините доведуваат до намалување на квалитетот на спермата и јајните клетки, меѓутоа, тоа засега не е научно потврдено со сериозни студии – вели доктор Лазаревски.

Доктор Татјана Гуржанова од Њуборн Клиник вели дека во својата пракса не забележале значително зголемување на процентот на машки стерилитет после прележана корона.

– Сепак, сме забележале краткотрајно naeu[uvawe, отприлика месец или два, во менструалниот циклус кај жените после прележана корона или после примена вакцина. Но, брзо доаѓа до враќање на циклусот во нормала – вели д-р Гуржанова.

Траги од вирусот во спермата

Истражувачите во Кина, во студија објавена во Лансет Журнал, известија дека откриле траги од корона вирусот во спермата и дека тоа потенцијално може да влијае на долгорочната плодност кај мажите. Затоа, тие побараа итно следење на машките пациенти за време на опоравувањето, со цел да се утврди сериозноста на последиците за мажите, односно за целото човештво.

Според Си-Ен-Ен, присуството на вирусот ковид-19 во спермата сѐ уште не е официјално откриено и нема докази дека вирусот може да се пренесе преку сперма. Сепак, ова не ја исклучува можноста ковид-19 да влијае на машкиот репродуктивен систем, бидејќи рецепторите АКЕ2, односно истите рецептори што вирусот ги користи за да стигне до белите дробови, исто така, се пронајдени во тестисите.

Како вирусот може да влијае на плодноста кај мажите?

САРС-КОВ-2, вирусот што предизвикува ковид-19, влегува во телото преку ензим кој е присутен во многу витални органи, како што се белите дробови, срцето, бубрезите и цревата. Бидејќи вирусот потекнува од органите и се размножува неконтролирано, овие органи можат да претрпат значителна штета.

Досега, ACE2 ензимски рецептори се пронајдени во респираторниот, дигестивниот, циркулаторниот и нервниот систем. Прелиминарните студии, исто така, покажале потенцијално присуство и во репродуктивниот систем.

Истражувачите во Германија нашле директен доказ за оштетување на ткивото на тестисите по инфекција со корона вирус. Маркери на воспаление се пронајдени кај околу 44 отсто од пациентите со ковид. Сперматозоидите кај пациентите со ковид биле три пати побавни, а бројот на сперматозоиди бил драматично помал. Ваквите ефекти врз спермата се поврзани со понизок квалитет на спермата и намалена плодност. Иако таквите ефекти имаат тенденција да се подобруваат со текот на времето, тие и понатаму остануваат значително покачени кај пациенти со ковид, а колку се сериозни зависи од тежината на болеста.

Засега не постои согласност меѓу експертите и сѐ уште останува неизвесно дали ефектите на коронавирусот врз репродуктивниот систем покажуваат долгорочно намалување на квалитетот на спермата или е минлив феномен. Исто така, останува прашањето дали се работи за влијанието на самиот вирус или е последица на болеста (висока температура), но и можниот ефект на лековите што се користат во терапијата.

Научниците од Вухан, од Универзитетот Хуагунг, на почетокот од оваа година издадоа алармантно предупредување за потенцијално штетните ефекти на коронавирусот врз плодноста кај мажите. Проблемот беше забележан и кај нас, но докторите сметаат дека ситуацијата не е алармантна.

Мажите кои прележале ковид-19 и кои сега имаат проблем со стерилитетот веќе се појавуваат во уролошките ординации.

Фото: Freepik