ПРАВОСУДСТВОТО МОРА ДА СЕ ОСЛОБОДИ ОД ПОЛИТИЧКОТО МЕШАЊЕ Од утре почнуваат дебатите за измените на Законот за Судскиот совет

Од утре ќе почнат јавните дебати за измените на Законот за Судскиот совет што ги изготви работна група формирана од Министерството за правда, најави денеска министерот за правда Игор Филков. Тој  денеска учествуваше на дебатата во Владата, „Платформа: 100% посветени за тебе“, која беше посветена на правдата, безбедноста и на одбраната.

Осврнувајќи се на извештајот на Европската комисија за напредокот на Македонија во делот на правосудството, министерот Филков рече дека тој дава реален приказ на достигнувањата и на состојбите и е поттик за испорачување на потребните реформи.

Реформите во правосудството, рече Филков, се одвиваат во согласност со Развојната секторска стратегија за правосудство за периодот 2024-2028 со нејзиниот Акциски план. Во наредниот период клучен приоритет ќе биде да се реконституира советот што ќе следи како се имплементира стратегијата.

– Ни претстои една од најзначајните реформи од кои ќе зависи нашиот напредок кон Европската Унија, а тоа се Судскиот совет и Советот на јавни обвинители. Веќе од утре почнуваат јавните стручни дебати за нацрт измените и дополнувањата на Законот за Судскиот совет, подготвени од работната група формирана од Министерството за правда. Ова ќе биде само еден од неколкуте настани за консултирање на стручната јавност кои Министерството за правда планира да ги организира. Целта е да се обезбеди транспарентен и инклузивен процес кој ќе придонесе кон унапредување на законската рамка која го уредува работењето на Судскиот совет – рече министерот Филков.

Заклучоците и препораките од тркалезната маса, додаде тој, ќе бидат основа за понатамошно подобрување на текстот на законот.

Според Филков, овие дискусии нема да бидат површни. Тие ќе бидат сеопфатни, ќе ги вклучуваат сите релевантни фактори и ќе имаат цел да создадат решенија што ќе ја загарантираат независноста на судските  институции.

– Судскиот совет и Јавното обвинителство мора да бидат ослободени од каква било форма на политичко мешање и да функционираат единствено во служба на правдата. Овие тела ќе бидат реформирани за да работат со најголем интегритет, фокусирајќи се на професионалноста и строгото почитување на владеењето на правото – рече министерот Филков.

Тој говореше и за состојбата која ја затекнал во Министерството за правда, празниот буџет, нерационалност и крајна девастираност на институцијата.

– Моравме да реагираме веднаш и да преземеме конкретни активности. Реформата на комплексен систем како што е судството, бара упорност, храброст и поддршка од сите сектори на општеството. Ние сме подготвени тоа да го направиме. Во овие 100 дена докажавме дека промената не само што е можна, туку веќе е во тек. Ја поништивме одлуката на претходната Влада за десеткратно зголемување на нотарската тарифа. Како резултат на средбите со неколку синдикални организации, пристапивме кон изработка на нов закон за судската служба. Го завршуваме деценискиот процес за кодификација на граѓанското законодавство. Одржавме јавни расправи за Законот за кривична постапка, за понатамошно модернизирање и рационализирање на нашите правни процеси, по што ќе се пушти во владината процедура – рече Филков.

Министерот соопшти дека после 8 години, Комората на вештаци конечно е функционална и е упишана во Централниот регистар.

– Функционалната Комора на вештаци е клучен чекор кон подобрување на правниот систем и кон создавање на силен механизам за контрола и поддршка на вештаците во Македонија. Комората ќе биде одговорна за лиценцирање, едукација и за надзор на вештаците, со што ќе се обезбеди дека тие работат според професионалните и етичките стандарди. Ова, пак, ќе ја зголеми довербата во правосудниот систем и ќе придонесе кон фер и објективни правни постапки – рече министерот за правда Игор Филков.