ПРАТЕНИЦИТЕ СЕ ВРАЌААТ ОД ОДМОР Прво ќе се координираат кај Џафери, а потоа ќе удрат на законите

Пратениците во понеделник се враќаат на работа во Собранието, речиси на месец и половина пред локалните избори.

Во понеделник, според најавите од координаторите на пратеничките групи, се очекува тие да имаат средба на претседателот на Собранието Талат Џафери и потпретседателите по што ќе се знае како ќе тече работната недела на пратениците. Имајќи ги предвид изборите, дел од пратениците, веруваат дека активностите ќе бидат намалени и оти дискусиите следниот месец ќе бидат во контекст на локалните избори.

Првата недела од следната парламентарна сесија најверојатно ќе мине во знакот на комисиските расправи. По координацијата ќе се знае кога и дали би било свикано продолжение на некоја од собраниските седници. На собраниската веб страна како незавршени стојат осум седници од 2021 година, од кои пет биле закажани од мај до јули.

Нова седница се најавува за средината на септември, додека нови материјали пристигнати овој месец, се Предлог на закон за изменување и дополнување на Законот за иновациската дејност, Предлог на Закон за академија за судии и јавни обвинители, Предлог на Закон за контрола на опојни дроги и психотропни супстанции, Предлог на закон за лековите, Предлог на закон за парничната постапка, Предлог на закон за исплата на паричен надоместок на жртви од кривични дела со насилство..

Сега официјално на собранискиот сајт само на 1 септември (среда) има закажано три седници на собраниската Комисија за политички систем и односи меѓу заедниците, како и седница на Комисијата за економски систем.

На комисиите за политички систем и односи меѓу заедниците на дневен ред се Предлог на закон за изменување и дополнување на Законот за административни службеници, во второ читање, поднесен од пратениците од владејачкото мнозинство,  Предлог на закон за изменување и дополнување на Законот за прекршоците, по скратена постапка, во второ читање, како и Предлог на закон за изменување и дополнување на Законот за заштита на лични податоци, по скратена постапка, исто така во второ читање.

Комисија за економски прашања ќе расправа за Предлог- закон за изменување и дополнување на Законот за трговските друштва, Предлог – закон за изменување на Законот за метрологијата, Предлог- за изменување на Законот за контрола на предметите од скапоцени метали, Предлог – закон за изменување и дополнување на Законот за занаетчиство, Предлог- закон за изменување и дополнување на Законот за контрола на извоз на стоки и технологии со двојна употреба, Предлог- закон за изменување и дополнување на Законот за едношалтерскиот систем и за водење на трговскиот регистар и регистар на други правни лица и Предлог-закон за изменување и дополнување на Законот за трговија, сите во второ читање.