ПРАТЕНИЦИТЕ ЌЕ ОДЛУЧУВААТ ЗА „МИТИЛИНЕОС“ За оваа инвестиција се преговара веќе две ипол години

Вицепремиерот за економски прашања Фатмир Битиќи вели дека пратениците ќе одлучат за евентуалната реализација на стратешкиот инвестициски проект „Митилинеос“, когенеративна постројка Скопје, ако има потреба нешто да се смени преку амандмани откако ќе се закаже собраниската комисија за четирите закони меѓу кои е и законот за овој проект.

– Не, не може да се најде на владина седница. Таа е во собраниска процедура. Помината е потребата за донесување на четирите закони по скратена постапка, се очекува да се закаже Комисијата на која што ќе се расправаат сите четири и судбината е во рацете на пратениците. Сите пратеници имаат можност во моментот кога ќе се закаже Комисијата да дадат амандмани ако треба нешто да се смени и ако законот помине. Ние на најтранспарентен и отчетен начин тоа го направивме. Буквално сите услови од договорот се обзнаени, ги има целата јавност, ги имаат сите пратеници, ние сме достапни како повереници и јас лично како повереник заедно со другите во службата да објасниме, да дообјасниме нешто што не е доволно јасно. Не убедуваме никого затоа што договорот е на маса. На крај се самите пратеници коишто треба да одлучат која ќе биде судбината на секоја една инвестиција – рече Битиќи одговарајќи на новинарско прашање по денешната обиколка на новото училиште „Визбегово“.

Битиќи вчера на прес-конференција, одговарајќи на новинарско прашање посочи дека на седница на Влада ќе се видат аргументите за овој проект.

– Има таков предлог на седница на Влада, ќе видиме кои се аргументите. Предлогот на компанијата „Митилинеос“ е преговаран две и пол години и ако сакате ќе ги добиете записниците од комисиите за стратешки инвестиции, десет на број, во кои што сите институции се вклучени во преговорите, за тоа ќе се разговара на седница на Влада. Дали има потреба од повлекување, ќе видиме на седница на Влада. Тогаш ќе можам да одговорам – рече Битиќи.

На новинарско прашање во врска со тоа дали смета дека треба да продолжат собраниските процедури околу Предлог-законот, со оглед на реакциите во јавноста, Битиќи рече дека „ако реакција на еден потпишан уметник и бивш дипломат е реакција на експертската фела, тогаш на тој начин треба да се разговара за секое едно прашање во нашето општество“.

– Јас навистина ги ценам експертите, но ценам вистински експерти кои својата експертиза и знаење ги ставаат во насока на помош на нашата држава и унапредување на политиката – рече Битиќи.

Тој вели дека аргументите ќе се стават на маса и дека ќе се разговара за предлогот на министерот за економија, бидејќи на тој начин се носат одлуките на Влада.

Во врска со барањето на Комисијата за заштита на конкурентноста за дополнително објаснување околу државната помош, Битиќи рече дека Комисијата има две забелешки.

– Едната е во однос на членот 11 во договорот и тој сметам дека соодветно ќе биде сменет, бидејќи не се доделува државна помош. Државна помош се доделува со договор за државна помош за којшто има соодветна процедура и тој договор никогаш не е во законска одредба, којашто кажува дека договор за државна помош треба да оди во Собрание. Во моментот кога договорот за државна помош ќе биде актуелен, ќе влезе во соодветна процедура кај Комисијата за заштита на конкурентност за да даде мислење и решение. Доколку Комисијата не даде мислење, ниту решение по однос на државна помош, тој соодветно ќе се поправи. Ништо не е надвор од законот – изјави Битиќи.