Порталот МКД реагира: Македонска адвокатка и српски фотограф се обидуваат да се збогатат од дупките во македонскиот судски систем!

Веќе неколку години, десетина македонски портали водат битка со извесен фоторепортер Живан Паниќ од Смедерево и со неговата македонска адвокатка Маја Ристова, кои си смислиле итар начин за лесно богатење, пишува порталот МКД.мк.

„За една единствена фотографија на Џони Штулиќ, која на времето ја направил Паниќ, тие од секој портал бараат по 5.000 евра. Но, цената на самата фотографија е незначителна. Штосот е во нешто сосема друго.

Реалната цена на една фотографија, во зависност од околностите, е од 30 до максимум 300 евра. Ако Паниќ и Ристова уште во првата тужба побараа реален надомест на штета за авторско дело, повеќето портали веднаш ќе му го платеа ајде да кажеме заслужениот хонорар на српскиот фотограф. Но, очигледно е дека цената од 5.000 евра по фотографија е намерно одбрана за да се оневозможи да ја платат порталите, кои сѐ уште мака мачат со извори за опстанок и за повеќето тоа би значело банкрот.

Но, она што всушност ќе ве банкротира е бројот на судските рочишта. Секое рочиште за странски клиент, според тарифата на Адвокатската комора на Македонија, чини 56.120 денари, речиси 1.000 евра. Пет рочишта – 5.000 евра, по 10 портали – потенцијална добивка од 50.000 евра. Богат плен за смедеревскиот фоторепортер и за македонската адвокатка Ристова. На крај, за самата фотографија не ни мораат да побараат пари, или пак може да побараат само некоја симболична сума – нивниот ‘бизнис модел’ успешно се спровел и без тоа“, пишува авторот А.Д.

Порталот МКД.мк резимира:

„Накратко, ако македонското судство остане слепо за оваа провидна шема, ќе се дојде до: а) затворени македонски портали поради неиздржливо високи парнични трошоци; б) задоволен Живан од Смедерево; в) Џони Штулиќ без денар од сето тоа бидејќи тој му нема дадено дозвола на Паниќ да заработува од неговиот лик“.

Порталот објаснува дека досега спорот го загубил еден од порталите, и тоа само затоа што поминал рокот за жалба. Адвокатите со кои зборувал МКД.мк рекле дека тоа е нечуено, дека ниту еден адвокат не смее да си го дозволи и дека во заднината сигурно е нешто сосема друго.

„Оттогаш адвокатката Ристова на секое од преостанатите рочишта мавта со таа пресуда и бара и другите судии, според судската пракса, да пресудат во нејзина корист. Дел од оваа група портали е и МКД.мк. Ние односната фотографија на Џони Штулиќ ја објавивме во 2012 година, кога беше слободна за користење на Гугл (на Паниќ му текнало да ја заштити дури во 2017 година). Друг портал, пак, воопшто не ја ни објави фамозната фотографија, туку само стави линк до хрватски веб-сајт, на кој беше фотката, па сепак си доби тужба. Тоа е исто како да го обвините Тајм.мк за нешто што било објавено на друг медиум само поради линкот до таа содржина што постоел на агрегаторот“, пишува авторор А.Д.

Во случајов, има и многу други небулози, тврди МКД.мк и појаснува:

„Бидејќи за старите фотографии единствениот доказ за авторско право е негативот од фотката, судот побарал да биде донесен негативот. Тој до денес не е донесен. Според македонскиот Закон за авторско право, на секое авторско дело мора да биде назначено дека е забрането користењето. На Гугл фотографијата на Паниќ во 2012 не беше обележана како забранета за користење.

Тужителите даваат и различни датуми за создавањето на фотографијата. Според еден од дадените датуми, излегува дека Паниќ кога бил 12-годишно дете го сликал Штулиќ“.

МКД.мк цитира изјава на Валентин Пепељуговски, еден од нашите најдобри адвокати во сферата на авторските права, кој вели дека тука е очигледна валканата игра на некои негови колеги.

„Судот мора да води сметка и за начелото на економичност и да не ги досудува сите трошоци што не се потврдени. Не може за една фотографија од сите портали некој да добие многу повеќе од вистинската вредност. Има недоследност и во судскиот систем. Треба да се плати за авторското дело, ама не да се казнува”, изјавил Пепељуговски за МКД.мк.

„Во меѓувреме, Живан Паниќ од Смедерево и Маја Ристова од Скопје си ги тераат процесите, преку разни игри со недоследностите во македонскиот судски систем и злоупотреба на фактот што онлајн-авторските права се нешто ново, недопрецизирано и непознато за голем број судии и закони. Пред 4 години српски портали пишуваа за своевидна фотомафија, која смислила згоден начин да изнудува лесни пари од медиуми. Сега е на ред Македонија“, заклучува авторот А.Д.