ПОРАДИ ПРОБЛЕМИ СО СРЦЕТО ИЛИ ЗАРАДИ БОЛЕСТ НА МАЈКА Кичеец имал 30 дена прекин на затворската казна

Осудениот на три години затвор во случајот „Рекет”, Зоран Милески Кичеец за кој дел од медиумите објавија дека е еден од повредените во денешната тешка сообраќајка кај Стража, имал прекин на казната во траење од 30 дена, поради здравствени кардиоваскуларни проблеми, објави Телма повикувајќи се на Управата за извршување санкции.

Од таму информирале дека на Кичеец решението му било потпишано на 8 август, а тој требало да се врати во затворот до 8 септември. Тој ги користел дури и правата на вработување надвор од затворот па дури и за годишен одмор од 24 дена.

Директорот на затворот во Струга Ваљон Ќуља, каде Кичеец ја издржува казната затвор, за МИА пак изјавил дека осудениот Зоран Милески Кичеец, на негово барање, бил на прекин на казната од 11 август до 11 септември поради болест на неговата мајка.

Во денешната тешка сообраќајка едно лице загина, а седуммина се повредени.

–  Непосредно по сообраќајката организиран е тим од медицински персонал кој ги прими повредените во ообраќајната несреќа. Тројца, поради сериозноста на повредите и не во животозагрозувачка состојба, се испратени на скопските клиники. Набрзо за Скопје е испратен уште еден пациент, а останатите тројца коишто биле донесени на Урегентното одделение се медицински згрижени – изјави за МИА директорот на гостиварската Општа болница „Ферид Мурад”, Јакуп Јакупи.

Меѓу полесно повредените, според болнички извори, е и Кичеец.

Зоран Милески призна вина за случајот „Рекет“, во кој се осудени и Катица Јанева и Бојан Јовановски и спогодбено доби најниската затворска казна. Милески е осуден на три години затвор, откако во декември 2019 година го призна делото за случајот „Рекет“ – примање награда за противзаконито влијание.