ПОПЛАВЕН ИСТ ГЕЈТ, ПОДВОЗНИКОТ КАЈ СТОКОВНА, АВТОКОМАНДА ПЛИВА Арсовска свика Итен состанок на кризниот штаб (ВИДЕО)

Невремето во Скопје го стопираше сообраќајот. Слики и видеа од поплавените улици осамнаа на Фејсбук. Поплавен е новоизградениот ексклузивен трговски центар Ист Гејт Мол. Поплавен е и подвозникот кај Стоковна куќа мост. Во Автокоманда возилата до пола пливаа во реката, покажува друго видео. Претходно, поранешниот градоначалник Шилегов објави дека поплавена е улицата Кочо Рацин кај Црвениот Крст.

Градоначалничката Данела Арсовска свика итен состанок на Кризниот штаб на Град Скопје, соопштија од Градот.

Невремето проследено со пороен дожд, град, грмотевици и ветер што попладнево го зафати Скопје, предизвика поплавување на улици, подвозници, куќи и дворови. Има и искрешни дрва и гранки. Силниот дожд и градот го отежнуваат движењето по улиците чии коловози се под вода.

Од ЦУК информираат дека освен Скопје, од невреме попладнево се зафатени и Штип, Велес, Демир Хисар, Свети Николе.

УХМР најави дека нестабилното време со пороен дожд, грмежи и засилен ветер ќе се задржи до петок, особено во попладенвните часови. Локално ќе има поинтензивни процеси во форма на невреме со пообилен дожд за кратко време, силен ветер и услови за појава на град.