ПОЛИЦИЈАТА ПАК ГО ЧУВА ГОЦЕ Пособен режим на сообраќај денеска и утре поради 120-годишнината од смртта на револуционерот
Од МВР упатија апел до сите учесници во сообраќајот да ги почитуваат наредбите кои ќе ги даваат полициските службеници.
Исто како и во февруари, така и сега гробот на македонскиот револуционер Гоце Делчев во дворот на црквата „Свети Спас“ во Скопје во овој момент е можеби најбезбедното место на светот, бидејќи утре ќе се празнува 120-годишнината на револуционерот, па затоа екипи на МВР уште од денеска го регулираат движењето.
Од Министерството за внатрешни работи информираа дека од 19.00 часот денеска (03.05.2023 – среда) и утре (04.05.2023 – четврток), Единицата за безбедност на патниот сообраќај при СВР Скопје ќе преземе мерки за посебен режим на сообраќајот.
„Според потребите, утре за сообраќај ќе биде затворена ул.„Самоилова”, на потегот од ул.„Иљо Војвода” (виадукт Самоилова) до крстосницата со ул.„Прохор Пчински”, а на 04.05.2023 (четврток) затворена за сообраќај ќе биде ул.„Самоилова”, на потегот од ул.„Лазар Личеновски” (Амбасада на САД) до бул.„Гоце Делчев” во Скопје“, соопштија од министерството.
Оттаму апелираат до сите учесници во сообраќајот да ги почитуваат наредбите кои ќе ги даваат полициските службеници.