📽️ ПОДЗЕМНИ БУНКЕРИ ЗА СУПЕРБОГАТИТЕ ВО ШВАЈЦАРИЈА Еве што ќе чуваат милијардерите ако „дојде крајот на светот“

Подземни бункери за супербогатите се градат во Швајцарија, со цел во случај на глобална катастрофа да ги заштитат своите уметнички дела, автомобили, па дури и колекции на вино, пишува британски „Сан“.

Компанијата „Brünig Mega Safe“ ископува до 25 пештери во близина на алпското село Лунгерн, југозападно од Луцерн.

Трезорите се ископани на повеќе од 100 метри длабочина во варовничка карпа и првенствено се наменети за складирање и заштита на вреден имот.

Во внатрешноста температурата природно се одржува на околу 13 степени Целзиусови, што создава идеални услови за чување вино и уметнички дела.

Цените започнуваат од 455.000 фунти, а потоа растат во зависност од барањата на купувачите, со ветување за речиси целосна безбедност.

 

🇨🇭 Des milliardaires fuient Dubaï pour enterrer leurs fortunes au cœur des Alpes suisses !

🏔️ Thomas Gasser, fondateur de Brünig Mega Safe AG, creuse des galeries à 100 mètres sous terre à Lungern pour créer des coffres-forts ultra-sécurisés.

💰 Chaque caverne se vend au… pic.twitter.com/2FwNEbU4es

— Alex Xplore (@AlexXplore) August 17, 2026

На истата локација се планира изградба и на низа дополнителни содржини, меѓу кои стрелиште, гастро-паб, складиште за експлозив и објект за обука на пожарникари.

Поради зголемената глобална нестабилност, вклучително и војните и пандемиите, пештерите се нудат и како потенцијални засолништа за луѓе.

Компанијата „Brünig Mega Safe“ веќе преговара со околу десетина потенцијални купувачи.

На веб-страницата на компанијата се наведува дека дополнителните просторни модули можат да се додадат во безбедносните пештери кога на клиентите им е потребно нешто повеќе од самата заштита.

Како можности се наведуваат простории за привремен престој, дискретни простории за состаноци и салони со посебен амбиент.

Компанијата најавува дека работите во Бриниг треба да започнат во јануари, а нејзините трезори ги опишува како објекти кои ќе бидат „споредливи со оние на Швајцарската национална банка“.

Томас Гасер, претседател на „Brünig Mega Safe“, за РТС изјавил дека клиентите прво ќе мора да поминат низ специјален контролен пункт.

– Прво ќе мора да поминете низ специјален контролен пункт и да излезете од возилото. Ќе има неколку безбедносни проверки, кои, се разбира, нема да бидат јавно откриени – рекол Гасер.

Тој додава дека во минатото Дубаи се сметал за безбедно место, но дека денес тоа чувство на сигурност е доведено во прашање.

– Луѓето едноставно сакаат да обезбедат дел од своето богатство – вели Гасер.

Швајцарија веќе со децении ги користи своите планини за безбедно складирање. Голем број напуштени воени бункери се претворени во трезори, а некои и во центри за податоци.

Сепак, концептот на приватни луксузни засолништа не е нов. Безбедносните компании заработуваат од зголемениот страв од големи глобални катастрофи, особено по руската целосна инвазија врз Украина.

Меѓу милијардерите кои инвестираат огромни суми во високообезбедени имоти е и Марк Закерберг.

Извршниот директор на Мета гради голем имот на хавајскиот остров Кауаи, на површина од околу 1.400 хектари.

Вредноста на имотот се проценува на повеќе од 200 милиони фунти, а во рамките на комплексот има и подземно засолниште од околу 460 квадратни метри.

Според извештаите, засолништето има сопствени извори на енергија, резерви на храна и врати отпорни на експлозии, а целиот имот е опфатен со строги безбедносни протоколи.

Медиумите, исто така, известуваат дека Бил Гејтс има бункери под повеќе од своите домови.

Трендот покажува дека дел од најбогатите луѓе во светот се подготвуваат не само за финансиски ризици, туку и за сценарија во кои глобалните кризи би можеле сериозно да ја нарушат безбедноста и нормалното функционирање на општеството.