ПОЧИНА ЅВЕЗДАТА ОД „ИГРА НА ТРОНОВИ“ Ирскиот актер Мајкл Патрик (35) имаше моторна невронска болест
Ирскиот актер Мајкл Патрик, познат по својата улога во хит серијата „Игра на тронови“ и бројни театарски претстави, почина на 35-годишна возраст по битка со моторна невронска болест (МНБ)
Тажната вест за смртта на ирскиот актер Мајкл Патрик (35), познат по својата улога во хит серијата „Игра на тронови“ и бројни театарски претстави, ја потврди неговата сопруга Наоми Шиан. Патрик, кој пријателите и семејството го викаа Мик, починал мирно опкружен со своите најблиски, по битка со моторна невронска болест.
– Синоќа, Мик тажно нè напушти. Му беше дијагностицирана моторна невронска болест на 1 февруари 2023 година. Пред десет дена, тој беше примен во хоспис, каде што за него се грижеше неверојатен тим. Почина мирно, опкружен со семејството и пријателите – напиша таа покрај фотографија од нивната свадба.
Таа додаде дека Мик бил инспирација за сите што имале можност да го запознаат, не само за време на неговата болест, туку и во текот на целиот негов живот.
– Тој го живееше животот до максимум. Радост, богатство на дух, заразна смеа. Тој беше вистински црвенокос титан. Зборовите не можат да опишат колку сме скршени“ – пишува во нејзината објава.
Таа ја заврши својата порака со цитат од ирскиот поет Брендан Беан, кого Мик многу го сакал: „Најважните работи во животот се да имаш нешто за јадење, нешто за пиење и некој да те сака“.
View this post on Instagram
Храбра борба и пркосење на болеста
На Мајкл Патрик му беше дијагностицирана болеста во февруари 2023 година. Моторната невронска болест е прогресивно невролошко нарушување кое ги уништува моторните неврони, клетките што ги контролираат клучните мускулни функции како што се одење, дишење, зборување и голтање, пишуваат странските медиуми. Неговата борба е трагично усложнета и од фактот дека неговиот татко починал од истата болест кога Мајкл бил тинејџер.
И покрај тешката дијагноза, Патрик продолжил да работи со неверојатна сила. Порано оваа година, во својата последна објава на Инстаграм, тој ја сподели со своите следбеници тешката одлука да не се подложи на трахеостомија, хируршка процедура што ќе му го продолжеше животот.
View this post on Instagram
Кариера што ги помести границите
Иако многумина го паметат по неговата улога во шестата сезона на „Игра на тронови“, Мајкл Патрик беше првенствено почитуван театарски актер. Дипломирал на Кембриџ и остварил значајни улоги во Royal Shakespeare Company. Неговата кариера го достигнала својот врв веднаш по дијагнозата.
Во 2024 година, тој влезе во историјата како првиот актер со попреченост во Ирска што ја играл главната улога во „Ричард III“ во театарот Лирик во Белфаст, во инвалидска количка.
Претставата, која ја адаптираше со својот долгогодишен соработник Оисин Кирни, му донесе престижни сценски награди.