ПОЧИНА МАРТИ АХТИСАРИ Финскиот дипломат беше познат по својата мисија на Косово

Поранешниот претседател на Финска и специјален пратеник на Обединетите нации за Косово и Метохија, Марти Ахтисари, почина на 86-годишна возраст. Тој беше претседател на Финска од 1994 до 2000 година.

Пред да стане претседател, тој беше на неколку функции во финското Министерство за надворешни работи и во Обединетите нации.

– Длабоко сме ожалостени од веста за смртта на претседателот Марти Ахтисари. Марти Ахтисари веруваше во луѓето, цивилизацијата и добрината и живееше голем живот. Тој беше претседател во време на промени, кои ја насочија Финска во глобалната ера на ЕУ –  рече актуелниот претседател на Финска, Саули Нинисто.

Марти Ахтисари е познат по прочуениот „план на Ахтисари за Косово и Метохија“. Роден е на 23 јуни 1937 година, а во 2008 година ја доби Нобеловата награда за мир за „неколку децении ангажман и посредување во воспоставувањето мир и решавање на конфликти на неколку континенти“.

Дипломирал на Универзитетот во Осло, а кариерата ја продолжил во Пакистан како учител во училиште. Во 1992-1993 година претседава со меѓународната конференција за СФРЈ. Тој е специјален претставник на генералниот секретар на ОН.

Во мај 1999 година, тој доброволно се понуди да биде неутрален претставник во разговорите за завршување на војната во СФРЈ. Тој посредуваше меѓу рускиот претставник Виктор Черномирдин и неговиот американски колега Строуб Талбот.

Поранешниот генерален секретар на ОН, Кофи Анан, го назначи за специјален пратеник на ОН за преговори за идниот статус на Косово и Метохија.

Неговиот план, иако беше одбиен од Советот за безбедност и Србите, стана основа за прогласување на независноста на Косово.