ПО ГРУБИ, ВО ПРИТВОР И ПEРПАРИМ БАЈРАМИ Сам се пријавил утрово

Утрово во 05:35 часот, Перпарим Бајрами од Куманово, роден на 10 февруари 1993 година, самоволно и пеш се пријавил кај надлежните органи  на граничниот премин Блаце, информира МВР. 

По Бајрами била распишана мерка „апси“ по барање на СМПС – Одделение за потраги, согласно член 354 став 5 од Кривичниот законик.

Мерката е потврдена, по што Бајрами е лишен од слобода, пренесен е во Истражниот затвор – Скопје и ќе биде спроведен на понатамошна постапка пред надлежните органи.

Со ова, по Артан Груби, уште едно лице по кое се трагаше е ставено на располагање на органите на прогонот. Перпарим Бајрами е првообвинет во случајот за набавка на видеолотариски терминали за коцкање во државната компанија, во кој обвинетите се товарат за злоупотреби и проневера на околу 9,7 милиони евра од Државна лотарија.