ПИЈАН ВОЗАЧ? ВО РУСИЈА ТОА ЧИНИ КОЛА! Кремљ претвори 5.500 возила во „воена опрема“ која исчезнува на фронтот
Запленети 33.000 автомобили, од кои 5.500 завршиле во зоната на „специјалната операција“, потврди руското обвинителство.
Повеќе од 33.000 возила се запленети во Русија од возачи кои повторно биле фатени како управуваат под дејство на алкохол, а над 5.500 од тие автомобили биле префрлени во зоната на таканаречената „специјална воена операција“ во Украина, соопшти Канцеларијата на рускиот генерален обвинител.
Генералниот обвинител Александар Гучан изјави дека конфискацијата на имот стекнат преку кривични дела е „клучна алатка“ за заострување на одговорноста и слабеење на „економската основа на криминалот“.
Според него, системот за одземање возила од пијани возачи или од лица кои управуваат без дозвола е целосно функционален во последните две и пол години.
Во извештајот што го пренесе ТАСС се наведува дека покрај 5.500 возила испратени на фронтот, уште 146 автомобили се префрлени „за развој на нови региони“, додека 19 биле предадени на Министерството за вонредни ситуации.
На состанокот било истакнато дека мерките даваат резултати и дека до крајот на 2024 година се очекува намалување на кривичните дела поврзани со возење под дејство на алкохол за околу 15 проценти.