Пет компании заинтересирани за изградба на браната на река Отиња
До крајот на декември или почетокот на јануари следната година ќе се потпише договор со една од овие фирми која ќе ја гради браната на реката Отиња.
Пет фирми сакаат да ја градат браната на река Отиња, капиталниот проект за Штип, кој целосно ќе се финансира од државниот буџет. Рокот за доставување на понуди е завршен, а сега е периодот на евалуација, соопшти министерот за транспорт и врски Благој Бочварски.
– По завршување на евалуацијата ќе имаме конечно колку фирми се подготвени од овие пет коишто конурирале да учествуваат на надавањето, со цел да ја добиеме најповолната понуда за изградбата на браната на река Отиња. Проектите стануваат реалност, заради тоа што некој се грижи и работи за граѓаните – рече Бочварски, при денешната посета на Општина Штип.
Тој очекува до крајот на декември или почетокот на јануари следната година да се потпише договор со фирмата, која ќе ја гради браната на реката Отиња.
Средства за реализација на овој капитален проект се обезбедени и во буџетот за 2021 година.