ПЕСНИ, СЛАВЈЕ И РАДОСТ ВО ШТАБОТ НА СТУДЕНТСКАТА ЛИСТА Објавата на Вучиќ предизвика еуфорија
Според податоците што ги изнесе Вучиќ, Студентската листа освоила околу 2,2 милиона гласови, додека неговата листа добила приближно 1,7 милиони гласови.
Песни, аплаузи и радост во изборниот штаб на Студентската листа во Белград, откако Александар Вучиќ јавно објави дека неговата листа ги загубила вонредните парламентарни избори во Србија. Атмосферата е славеничка, се пеат песни, а присутните со големо задоволство ја прославуваат изборната победа.
Признавањето на поразот од страна на Вучиќ предизвика радост меѓу студентите и нивните поддржувачи, кои речиси две години беа предводници на протестното движење во Србија. Во штабот во Белград вечерва преовладува славеничка атмосфера, а политичката неизвесност што го одбележа изборниот ден отстапи место на прославата.
Вучиќ, кој ја предводеше листата „Александар Вучиќ – Обединета Србија“, во обраќањето од изборниот штаб на својата партија соопшти дека, според податоците со кои располага, победила Студентската листа.
– Немаме конечни резултати, многумина ќе бидат изненадени. Врз основа на стратификуваниот примерок, јасно е дека ги загубивме овие избори. Победи студентската листа – изјави Вучиќ.
Според податоците што ги изнесе Вучиќ, Студентската листа освоила околу 2,2 милиона гласови, додека неговата листа добила приближно 1,7 милиони гласови. Станува збор за процени соопштени пред објавувањето на конечните официјални резултати.
Победата на студентското движење претставува значаен политички пресврт во Србија, каде што Српската напредна странка со години беше доминантна политичка сила.