🎥 ПЕСНА И СПОТ ПОСВЕТЕНИ НА ЖРТВИТЕ ОД КОЧАНИ „Ангелски здив“ во чест на загинатите во трагичниот пожар во кочанската дискотека
Пејачката Ана Петановска вели дека ова е една од најтешките, но и најискрените песни што ги испеала, но се надева дека барем малку ќе им донесе утеха на семејствата на загинатите во кочанската трагедија.
Во чест на првата годишнина од трагичниот пожар во дискотеката во Кочани, Мето Ди Флеш и Ана Петановска ја објавија песната и видеоспотот со наслов „Ангелски здив“, посветена на прерано згаснатите животи во оваа голема трагедија што ја потресе Македонија.
Музиката, текстот и аранжманот за оваа песна посветена на младите животи кои трагично згаснаа во Кочани пред една година – спомен кој и денес силно одекнува во срцата на нивните најблиски, но и на целата македонска јавност, ги потпишува Методи Поповски, кој ја создал, како што вели, „во еден здив, воден од искрени чувства и длабока почит кон младите ангели кои прерано го напуштија овој свет“.
Песната е снимена во „Студио Флеш“, а во нејзината реализација учествува и Стефан Петановски, во чие студио ги снимала вокалите Ана Петановска. Зад видеото, кое визуелно ја пренесува силната порака на песната, стои Раде Гогоски, кој е комплетен автор – од идеја до финална реализација. Сцените се снимени на локации во Струга и Скопје, а во видеото се појавува и Анастасија Поповска, чија појава симболично ја претставува невината младост и сеќавањето на изгубените животи.
Особено значајно е што иницијативата за овој проект доаѓа од сопственикот на познатиот локал „Angels Cafe“ од Штип. Неговата идеја ги обединила уметниците и соработниците во заедничка мисија – преку музика да се испрати порака на љубов, сочувство и вечен спомен.
Пејачката Ана Петановска вели дека ова е една од најтешките, но и најискрените песни што ги испеала, но се надева дека барем малку ќе им донесе утеха на семејствата.
Според Мето Ди Флеш, ова не е само песна, туку е порака, спомен и почит.
– Секој од нас даде дел од своето срце во ова дело. Нека „Ангелски здив“ биде потсетник дека тие млади животи никогаш нема да бидат заборавени – вели тој.