Пендаровски: Нема потреба од кризна ниту вонредна состојба во целата земја, а изборите може да се одложат

Нема потреба од воведување кризна ниту вонредна состојба во целата земја во моментов, но не се исклучува доколку дојде до таква потреба да се прогласи во наредниот период, а изборите може да се одложат иако е донесена одлука за нивно распишување, изјави вечерва Претседателот на државата, Стево Пендаровски по состанокот на Советот за безбедност во вила Водно на тема „состјбата со коронавирусот во нашата земја“.

Можно е да се ограничи движењето од еден во друг град, како што е сега во Дебар и во Центар Жупа.

– Основниот заклучок е дека во моментов нема потреба од прогласување кризна или вонредна состојба на целата територија на државата, иако Владата вечерва ќе заседава и може и други мерки да препорача. А и без седница на Совет за безбедност може да се донесат други мерки. Деноноќно се  мониторира ситуацијата и јасно е дека кризата ќе трае, а мораме ресурсите кои не се издашни да ги димензионираме према потребите и ризиците. Во однос на ситуацијата и проценката на министерот за здравство, за ширење на болеста е дека е адекватна и соодветна поставеноста на државата. За тоа зборуваат и оценките на СЗО кои тврдат дека ние сме држава која најдоследно ги спроведува мерките. Ако има потреба, можеме да препорачаме како Совет за безбедност во државата да биде прогласена кризна состојба и во други општини, но сега нема потреба – рече Пендаровски.

Министерот за здравство, Венко Филипче на состанокот, кој траел два и пол часа, прв реферирал за најновата ситуација за која, според Пендаровски, вестите се позитивни.

– Во Центар жупа и Дебар има одлична соработка на терен меѓу Армијата и припадниците на Министерството за внатрешни работи како и со локалната самоуправа. Поставеноста на државата е адекватна, а ако има потреба, можеме да прогласиме кризна состојба – истакна претседателот Пендаровски.

Тој упати неколку апели до граѓаните во земјата но и до оние коишто и моментално се наоѓаат во странство и нагласи дека најдобар начин за епидемијата да не се шири е да се почитуваат сите донесени мерки.

– Апелирам граѓаните да ги почитуваат стриктно сите мерки кои се предложени и соопштени до сите нив. Тоа е потврдено најдобриот начин за спречување на ширењето на епидемијата. Сакам да упатам апел и до нашите државјани без потреба да не патуваат надвор, особено во земји кои се високоризични, а оние кои се наоѓаат во странство, да го одложат враќањето во земјата – рече  Пендаровски.