Јовески сака да биде уставен судија

Државниот јавен обвинител Љубомир Јовески ќе биде нов уставен судија, објави ТВ24, наведувајќи дека е еден од тројцата фаворити на власта.

Како што потврдил висок владин функционер за телевизијата, Јовески прифатил обвинителската фотелја да ја замени со фотелја во Устaвен суд, па тој е вториот кандидат по Фатмир Скендер кој до крајот на месецов ќе биде кандидиран од мнозинството во Собранието.

Јовески кој е службено отсутен од државата, преку СМС порака за ТВ24 порачал дека голем предизвик би му бил изборот за уставен судија доколку ја добие поддршката на пратениците.

„Чест е да се биде уставен судија и тоа е највисокиот дострел на секој правник. Одлуката ја носат пратениците и доколку тие сметаат дека со моето долгогодишно правничко искуство во Министерството за правда, како судија и како претседател на Основниот суд Скопје 2, јавен обвинител, член на Совет на јавни обвинители и државен јавен обвинител, можам да придонесам во работата на Уставниот суд, ќе ја прифатам оваа одговорна функција”, изјави за ТВ24 Јовески.