„ОВА Е ДРЖАВЕН УДАР, ПРЕДАВСТВО НА БУГАРИЈА“ Протест во Софија против еврото, демонстрантите бараат референдум
Во саботата, на централниот плоштад во Софија беше поставен транспарент со натпис: „Битката за бугарскиот лев е последна битка за Бугарија“, откако демонстрантите – предводени од граѓански здруженија, националистички и проруски партии – најавија дека ќе подигнат шатори и ќе го претворат просторот во таканаречен „Град на левот“, како симболичен чин во одбрана на националната валута.
Илјадници демонстранти се собраа во саботата на централниот плоштад во Софија, протестирајќи против одлуката на Владата за воведување на еврото, барајќи за оваа одлука да се одлучи на референдум.
Европската Унија го одобри воведувањето на еврото во Бугарија на 1 јануари.
Демонстрантите, предводени од граѓански здруженија, националистички и проруски партии – познати по своето противење на воведувањето на еврото – објавија дека планираат да постават шатори на централниот плоштад и да го претворат во „Град на левот“ – по името на бугарската валута.
На плоштадот беше поставен транспарент со натпис: „Битката за бугарскиот лев е последна битка за Бугарија“.
Лидерот на проруската партија Препород, Костадин Костадинов, рече дека со воведувањето на еврото, „некој друг ќе одлучи како ќе ги трошиме парите, а бугарскиот буџет ќе биде одобрен од Европската централна банка. Тоа е државен удар, предавство“. Костадинов рече дека претставници од Германија, Литванија, Романија, Чешка, Словачка и од Унгарија дошле на протестот во Софија.
Пред протестот, партијата Препород поднесе предлог за недоверба на владата до бугарскиот Парламент, обвинувајќи ја (владата) дека не ги спроведува реформите, потребни за стабилизирање на јавните финансии, туку наместо тоа – работи на воведување на еврото. За предлогот ќе се гласа следната недела, но се очекува дека проевропската владејачка коалиција ќе преживее.
Бугарија е членка на Европската Унија од 2007 година и сега е во последната фаза од пристапувањето кон Еврозоната. Последната институционална одлука ќе биде одобрувањето од Европскиот парламент во Стразбур и од Советот за економски и финансиски прашања во Брисел на 8 јули. Европскиот совет веќе даде јасна поддршка за влезот на Бугарија во еврозоната на 1 јануари 2026 година.
Во текот на речиси две децении членство во ЕУ, Бугарија се соочи со политичка нестабилност и со корупција, поттикнувајќи го евроскептицизмот кај нејзините 6,4 милиони граѓани.
Бројни тврдења на противниците на еврото сега се шират на социјалните мрежи, кои поттикнуваат страв од економски промени кои, според нивните тврдења, би можеле дополнително да ја зголемат сиромаштијата. Економистите сметаат дека приклучувањето кон Еврозоната нема да донесе значајни промени во бугарската економија на краток рок.