Охрид стенка под товарот на гостите, дали е тоа „проблем“ само на охриѓани!?
Честит празник, за многу години Илинден, радост и среќа да ни донесе пророкот Свети Илија.
Охрид стенка под товарот од десетици и десетици илјади гости. Не го паметам одамна вака полн.
Бројот на дојдените, тврдам, е поголем од бројот на постојаните жители.
Од плоштадот до хотелот „Милениум – Палас“, шеталиштето е нова градска плажа, нема простор нога да се пушти!
Тешко комуналците и полицајците. Се покажаа и едните и другите. Присутни се насекаде, инаку би завладеал хаос.
Честитки!
Овој пат, што е за право, се покажаа и Оливер министерот, и Сашо началникот, и Коста градоначалникот, и Грданот – комуналецот.
Дежурните служби постојано собираат смет, на потегот од Студенчишкиот канал кон Горица, корпите постојано се празнат, но знаете како е. Се користи секоја скала за да се седне, а секаде каде може да се седне, нема и не може да се постават толку корпи.
Има време. И во Велика Британија тревата не беше како што е сега во парковите низ Лондон, пред 200 години!!!
Впечаток остава сликата со сообраќајната полиција. Насекаде сообраќајци на мотори, на секоја крстосница – возило на полицијата. Сирените од возилата се постојано присутен декор.
Стефан Димоски, портпарол на СВР Охрид, објаснува дека сиот полициски персонал е ангажиран. Особено во зачувувањето на редот и мирот и во регулацијата на сообраќајот.
– Незнам за постарите, јас ваква слика не паметам за Охрид. Полицијата тоа го очекуваше и навреме се престрои. Ангажиран е персоналот не само од Охрид, туку и од сите полициски станици кои се под надлежност на СВР Охрид. Најмногу од Кичево – додава Димоски.
Дали е сепак ова доволно?
Не е и тоа брзо ќе се почувствува.
Не сум проверил, затоа, ако не сум во право – однапред се извинувам. На Охрид овие денови му треба помош не само од полицајците. Туку и од комуналците од други градови, од здравствените работници, од пожарникарите….
Каде е народот, таму треба да се овие приоритетни служби. Ако во моментов 10 проценти од скопјани се во Охрид, или од битолчани, тогаш и 10 проценти од капацитетите на овие служби треба да се во Охрид.
Сирените на возилата од итната помош и на оние на полициските, ги надјачуваат децибелите на музичарите. Што ако нема возила за сите повици!? Дали е организирана припомош од други градови?
Само така ќе бидеме едно, само така ќе бидеме – „Сите во одбрана и заштита!“. Ние постарите паметиме времиња кога Македонија и Федерацијата во која бевме за вакви прилики и потреби беа организирани и делуваа на ваков начин.