ОГРОМНИ ПОПЛАВИ ВО ГЕРМАНИЈА Загинаа пожарникари, расте бројот на починати и исчезнати, водата носи автомобили (ВИДЕО)

Бројот на жртвите во катастрофалните поплави што ја погодија западна Германија се искачи на 20, а по уривањето на неколку куќи во областа Ајфел, бројот на исчезнати се проценува на 50 до 70. Во сојузните покраини Северна Рајна Вестфалија и Рајнланд-Пфалца состојбата по обилните дождови сѐ уште не е под контрола. Многу реки се излеаја од своите корита.

Пет лица се загинаа во регионот Ајфел на крајниот запад на земјата. Таму, откако беа урнати шест куќи во градот Шулд поради излевањето на реката Ахр, меѓу 50 и 70 лица се водат како исчезнати. Многу куќи поради штетата од поројот се пред уривање. Повеќе од 50 лица сè уште чекаат спасување на покривите на своите домови. Спасувачките екипи со хеликоптери тргнаа од Баварија кон оваа сојузна држава.

Во спасувањето загинаа двајца пожарникари

Ситуацијата е напната и на Рајна, особено во Кобленц, каде реката Мосел, на чиј слив припаѓаат потечените реки во Ајфел, се влева во Рајна. Во долниот дел на Рајна кон Келн и Дизелдорф, највисокиот водостој се очекува во текот на утрешниот ден и викендот. Во Келн, во сојузната покраина Северна Рајна-Вестфалија, две лица беа пронајдени во поплавените подруми, а во градот Алтена, двајца пожарникари ги загубија животите при обид да ги спасат граѓаните од поројот.

Во Хаген, низ кој течат четири реки, многу делови од градот се отсечени. Во овој град на работ на областа Рур, припадници на Бундесверот исто така дојдоа да помогнат со оклопни возила. Министерот за одбрана Анегрет Крамп-Каренбауер зборува за над 3.000 војници. Блискиот историски град Алтена сѐ уште е отсечен.

Фон дер Лајен: ЕУ е подготвена да помогне

Железничкиот сообраќај на целиот запад на земјата е колабиран, а властите ги повикуваат граѓаните да не патуваат непотребно. Прекинат е и железничкиот сообраќај кон соседните земји, Белгија и Холандија, каде што некои области се исто така погодени од поплави. Европската унија понуди помош на Германија и земјите од Бенелукс во погодените области.

– Европската унија е подготвена да помогне – рече претседателката на Европската комисија Урсула фон дер Лајен преку Твитер.

Владата на сојузната покраина Рајнланд-Пфалца одржа вонредна седница на која беа договорени понатамошни чекори во борбата против оваа катастрофа. Метеоролошките служби најавуваат понатамошни врнежи за остатокот од денот, но во помали количини од порано. Рекордни врнежи од дожд се забележани во скоро сите делови на Западна Германија во последните денови. Германскиот Црвен крст, кој учествува во операциите за спасување во погодените области, вели дека Германија треба да биде подобро подготвена за катастрофи од ваков вид, кои можат да станат почести во иднина.