ОД ПАТАРИНИ ВО ЈУЛИ СОБРАНИ 7,6 МИЛИОНИ ЕВРА Mицкоски вели парите завршиле во државната каса, а не во приватни џебови

На наплатните рампи во јули годинава направен е промет од 470.194.563 денари (7,645 милиони евра) што е за 16.071.251 денари (261.321 евра) повеќе споредено со истиот период лани, објави денеска премиерот Христијан Мицкоски, во пост на Фејсбук.

Тој вели дека овие пари завршиле во државната каса од каде ќе се потрошат за изградба на грдинки, училишта, патишта, за разлика од поранешната власт која, како што вели Мицкоски, ги трошела недомаќински.

– Нормализирањето на состојбите во државата значи домаќинско работење, базирано на чесност и на принципи. Затекнавме држава во хаос, се бориме да направиме ред и доследност – вели Мицкоски.

„Директорот на Јавното претпријатие за државни патишта, Коце Трајановски ме извести дека на наплатните рампи во јули 2024 година има промет од 470.194.563 денари што е повеќе за цели 16.071.251 денари, споредено со истиот период лани. Овие пари постоеле и минатата година, само разликата е што не завршувале во касата на државата, каде сега од тие пари градиме градинки, училишта, патишта. Инвестираме во болници, нови работни места. Разликата е во тоа што се работи домаќински и одговорно. Опозицијата води политика на ситни страсти и со целосна безидејност критикува колку да критикува, но тоа нема да нѐ поколеба да го поправиме тоа што тие го расипаа. Исполнуваме за секој еден човек. Државата на народот, Македонија за тебе“, напиша Мицкоски.