ОБВИНИТЕЛСТВОТО ЗАПОЧНА ПОСТАПКА ЗА ПОЖАРОТ ВО УНИВЕРЗАЛНА Се утврдува дали бил несреќен случај или човечки фактор
Локацијата ќе биде детално прегледана за да се обезбедат сите докази неопходни за утврдување на причините за настанување на пожарот, информираат од Јавното обвинителство.
Увидни екипи со јавен обвинител од Основното јавно обвинителство Скопје денеска го започнаа увидот на објектот на Универзалната сала каде вчера изби пожар, откако претходно локацијата е обезбедена и создадени се неопходните услови, информираа од Јавното обвинителство.
„Локацијата ќе биде детално прегледана за да се обезбедат сите докази неопходни за утврдување на причините за настанување на пожарот. Стручно вешто лице ќе се произнесе дали пожарот е евентуално предизвикан од човечки фактор или се работи за несреќен случај“ – се наведува во денешното соопштение од Обвинителството.
Во текот на вчерашниот ден, во рамките на своите надлежности, Државниот инспекторат за труд изврши контрола на работењето на фирмите ангажирани за реконструкција на објектот и изготви записник.
„Бидејќи сè уште трае фазата на прибирање докази, односно до овој момент не е утврдено дека пожарот настанал како последица на човечки фактор, вчера во полициска станица беа земени изјави од три задржани лица, по што тие беа пуштени со оглед на тоа што во оваа фаза нема основ за нивно натамошно задржување“ – велат од Јавното обвинителство.