НУКЛЕАРНО РАСПОРЕДУВАЊЕ НА БАЛТИКОТ Што би се случило ако Финска и Шведска влезат во НАТО?

„Не може повеќе да се зборува за статус без нуклеарно оружје на Балтикот доколку Шведска и Финска се приклучат на трансатлантската воена алијанса“.

Вака изјави вчера Дмитриј Медведев, заменик-претседателот на рускиот совет за безбедност на Русија по најавите дека овие две балтички земји ќе ѝ се приклучат на Алијансата. На што точно мислеше Медведев во изјавата? Доколку не се вразумат, рече тој, тие ќе мора да живеат со нуклеарно оружје и хиперсонични ракети блиску до дома, пишува Ал Џезира.

Балтичкото море, е токму местото каде Русија ја има својата Калининградска ексклава, руска територија сместена меѓу Полска и Литванија каде неодамна земјата изврши воени вежби. Додека финската министерка за Европа, Тити Тупурајнен, во интерјву за СкајЊуз рече дека „многу е веројатно дека ќе се приклучиме“, денеска Русија пак предупреди.

– Изборот зависи од шведските и финските власти, но тие треба да ги сфатат импликациите од таквиот чекор за односите со Русија и воопшто за европската безбедносна архитектура, која моментално е во криза – рече Марија Захарова, портпаролка на руското министерство за надворешни работи.

Недели ја делат Финска, која дели 1.300 километри граница со Русија од одлуката да не биде неутрална. Шведска будно размислува. После сѐ, Русија го има најголемиот арсенал на нуклеарни боеви глави во светот и, заедно со Кина и Соединетите Држави, е еден од глобалните лидери во технологијата на хиперсонична ракетна технологија.

Да го зајакнеме западното крило

Портпаролот на Кремљ, Дмитриј Песков, запрашан за коментарите на Медведев од страна на новинарите, рече дека „за ова се зборувало многу пати“, а претседателот Владимир Путин издаде наредба за „зајакнување на нашето западно крило“ поради растечкиот воен потенцијал на НАТО.

Запрашан дали ова засилување ќе вклучи и нуклеарно оружје, Песков рече:

– Не можам да кажам… Ќе има цел список на мерки, неопходни чекори. Ова ќе биде покриено на посебен состанок од страна на претседателот.

Русија има оружје во Калининград уште пред војната

Литванија рече дека заканите на Русија не се ништо ново и дека Москва има распоредено нуклеарно оружје во Калининград долго пред војната во Украина.

– Нуклеарното оружје отсекогаш се чувало во Калининград… меѓународната заедница, земјите во регионот, се совршено свесни за тоа – рече литванскиот министер за одбрана, цитиран од БНС.

– Тие го користат ова како закана – додава тој.

Засега нема коментар од НАТО за „нуклеарното предупредување“ на Русија. Сепак, евентуалниот влез на Финска и Шведска во НАТО,  ќе биде една од најголемите стратешки последици од војната во Украина.

Како Калининград стана руски?

Калининград, порано пристаниште Коенигсберг, главен град на Источна Прусија, се наоѓа на помалку од 1.400 километри од Лондон и Париз и 500 километри од Берлин. Бил заробен од Црвената армија во април 1945 година и отстапен на Советскиот Сојуз на конференцијата во Потсдам. Русија во 2018 година соопшти дека распоредила ракети Искандер во градот.

Искандерите, познати и како SS-26 Stone од НАТО, се тактички балистички ракетен систем со краток дострел кој може да носи нуклеарни боеви глави. Неговиот официјален домет е 500 километри, но некои западни воени извори се сомневаат дека може да биде многу поголем.

– Ниту еден разумен човек не сака повисоки цени и повисоки даноци, зголемени тензии долж границите, искандери, хиперсоници и бродови со нуклеарно оружје буквално на растојание од својот дом -рече Медведев.

Во меѓувреме, истекоа првите 50 дена од руската окупација на Украина. Притисокот врз Путин се зголемува бидејќи на Русија ѝ е потребна голема победа до антифашистичката парада на 9 мај. Според аналитичарите, руските сили се концентрираат на битките во регионот Донбас и ја сменија тактиката.

По потонувањето на рускиот брод „Москва“ од украинските сили на југот и најавите за влез на Финска и Шведска во НАТО, сепак, работите висат во воздух.