НОВИ 119 ВРАБОТУВАЊА ВО „БРАКО“ Компанијата годинава има раст на приходите од 51%

Од почетокот на годинава компанијата „Брако“ од Велес вработи 119 лица од кои 84 се на возраст до 40 години. Со отворањето нови работни места, младите од Велес и од целата земја, ја наоѓаат својата перспектива во компаниите кои се дел од Групацијата Фероинвест. Таа брои 1.000 вработени од кои 150 се инженери, со што директно се ублажува трендот на иселување и се придонесува во стабилизацијата на економијата.

Групацијата „Фероинвест“ има инвестиционен циклус од 21 милион евра, од кои 8 милиони евра се инвестирани во фабриката „Брако“ со што се одржува динамиката на компаниите и производствениот континуитет.

– Некои од нововработените го реализираат и своето прво вработување, започнувајќи да ја градат инженерската кариера токму тука, во некои од производствените програми на компанијата како што се производство на медицински мебел и медицински помагала, производство на најдобрите чистачи на улици под брендот „Green machines“. Производствени програми кои отворија нови работни места го вклучуваат и производството на опрема и приклучна механизација за вилушкари, производство на мобилни утоварни рампи, машини за додавање лимови на ЦНЦ ласери, куќишта за турбини за мали хидроцентрали и жичани производи – велат од компанијата.

Новите проекти и инвестиции ја продолжуваат тенденцијата на отворање нови работни места и тоа во услови на глобална здравствена криза предизвикана од пандемијата со ковид-19, кога компаниите се соочуваат и со 10% отсутност на вработените. Овој шок врз производството се надминува и притоа ниту еден работник не е отпуштен од своето работно место.

Приближно 90 проценти од производите се наменети за извоз. Остатокот, како и најразлични услуги е за домашни компании од областа на металопреработувачката индустрија.