НОВА КОРОНА УЧЕБНА ГОДИНА НА БАЛКАНОТ Кој и како ќе оди на училиште за време на четвртиот бран?

Решени да спречат повторување на минатата учебна година, кога мнозинството ученици на Балканот учеа од далечина во најголем дел од времето, повеќето балкански земји најавија почеток на наставата со физичко присуство за учебната 2021/2022 година.

Како и да е, останува непознато колку долго ќе се одвива наставата со физичко присуство во позадина на регистрираното зголемување на новозаболени со ковид-19 на Балканот и претстојниот четврти бран.

Еве како балканските земји ќе ја започнат новата учебната година.

Македонија

Учебната година во Македонија започна денеска (1 септември) со физичко присуство и распределба на свидетелствата за претходната учебна година.

Онлајн настава или хибриден модел, кој предвидува некои ученици да учат преку Интернет, а некои на училиште, ќе се применува доколку здравствените власти проценат дека ситуацијата со ковид-19 се влошува.

Децата со ретки болести, деца од семејства со хронично болни членови на семејството или на инсистирање на родителите, ќе можат да учат преку Интернет, но со дозвола од училиштето.

Србија

Српскиот штаб за коронавирус одлучи учебната година во земјата да започне на 1 септември и да има часови во времетраење од 45 минути, според министерот за образование Бранко Ружиќ.

Земјата предвидува три модели на работа на училиштата, во зависност од ситуацијата со епидемијата. Според првото, учениците ќе седат заедно на клупи и ќе носат маски додека разговараат, а вакцинираните наставници нема да носат маски додека не му пријдат на ученик на помалку од 1,5 метри.

Вториот модел ќе важи за учениците од основно и средно училиште од седмо и осмо одделение, кои еден ден ќе посетуваат училиште и еден ден ќе учат преку Интернет. Според третиот модел, кој ќе се применува во општините со најголем број на лица заразени со ковид-19, ќе се спроведе онлајн настава за средношколците и комбинирана настава за учениците од основните училишта.

Општините во земјата ќе бидат поделени на зелени, жолти и црвени зони во зависност од текот на пандемијата, а во градинките и предучилишните групи децата нема да носат маски, како и вакцинираните воспитувачи.

Словенија

Во Словенија, новата учебна година започнува на денеска со услов за редовно тестирање на училишниот персонал во случаи кога нема вакцинација или прележан ковид-19. Директорите на училиштата добија уредба според која одбивањето на вработените да бидат тестирани за коронавирус може да биде причина за отказ. Сите вработени во училиштето кои не биле болни и не биле вакцинирани мора да се тестираат секоја недела, а неоправданото одбивање на тестирање ќе се смета за прекршување на должноста. Во овој случај, на вработениот ќе му се даде писмено предупредување пред отпуштање или ќе започне постапка за отпуштање, а истото важи и доколку вработените одбијат да носат заштитни маски.

Црна Гора

Учебната година во Црна Гора традиционално ќе започне на 1 септември, но часовите наместо вообичаените 45 минути ќе бидат со траење од 30 минути, изјави државниот секретар на црногорското Министерство за образование Милица Кадовиќ. Како и да е, Министерството за образование обезбеди онлајн модел за настава како опција, во зависност од епидемиската ситуација.

Босна и Херцеговина

Денеска стартуваше новата учебна година и во Босна и Херцеговина. Годинава часовите се одржуваат со полн капацитет, односно 45 минути. Засега, нема режим на настава преку Интернет поради пандемијата со коронавирусот.

Од директорите на училишта има ветување дека се надеваат дека за кратко време ќе можат да ја поправат штетата предизвикана од наставата преку Интернет, и дека наставниците добиле конкретни инструкции во врска со почетокот на часовите.

Според инструкциите на Министерството за образование, учениците постари од 11 години се должни да носат маски, а мора да се држи растојание од еден метар.

Хрватска

Учебната година во Хрватска започнува на 6 септември 2021 година и завршува на 21 јуни 2022 година и 25 мај 2022 година, соодветно, за средношколци.

Предложени се три модели на едукативна работа во градинките и училиштата во услови поврзани со ковид-19.

Тоа се: едукативна работа и настава во институцијата, мешана форма на едукативна работа/настава (дел во институцијата, дел на далечина) и едукативна работа и онлајн настава. Ова се флексибилни модели што можат да се менуваат или дополнуваат на локално ниво во согласност со епидемиолошката слика и новите наоди за ширење на САРС-КоВ-2.

Без разлика кој од моделите и во кој момент ќе се активира, на сите едукативни институции им се препорачува доследно спроведување на мерките и препораките за работа со цел заштита на персоналот и учениците од коронавирусот.

Грција

Училиштата во Грција нема да се префрлат на учење од далечина во оваа година, а владата ќе бара други мерки за борба против можното ширење на коронавирусот, рече грчкиот заменик министер за образование Зета Макри.

– Нема да се вратиме на учење на далечина бидејќи имаме вакцинација – рече таа, дозволувајќи мерката да се примени во исклучителни случаи, како што се деца од ранливи групи.

Училиштата во Грција ќе се отворат на 13 септември, како и обично, под услов на строги безбедносни протоколи против ковид-19. 75-80 проценти од наставниците се вакцинирани или барем имаат термин за вакцинација.

Учениците ќе мора да доаѓаат на училиште или со потврда за вакцинација (за возрасна група од 12-17 години) или со сертификат за прележан ковид-19 во последните шест месеци. Во спротивно, тие ќе мора да прават тестови двапати неделно и да донесат потврда за негативни резултати при влегување во училиште.

Наставниците кои не биле вакцинирани и немале ковид-19, ќе треба да направат двапати неделно ПЦР тестови на свој трошок во приватни лаборатории. Во случај наставникот да не достави ниту еден од овие документи, тој/таа ќе биде суспендиран од работа без плата.

Турција

Во Турција учебната година ќе започне со физичко присуство на 6 септември, а наставниците и училишниот персонал кои не се вакцинирани ќе треба да прават ПЦР тест најмалку двапати неделно, објави турскиот претседател Реџеп Таип Ердоган. Исто така, ќе има барање за ПЦР тест за студентите и вработените на универзитетот кои не се вакцинирани. Министерот за здравство Фахретин Коџа појасни дека задолжителните редовни тестови за ПЦР што ќе се бараат од невакцинирани лица во Турција ќе бидат бесплатни.

Присуството е закажано од 6 септември за сите одделенија. Учениците кои имаат изговор да не учествуваат на часовите ќе можат да го продолжат своето учење од далечина преку креираните платформи.

Во Турција, со дозвола на родителите, може да се вакцинираат деца над 15-годишна возраст, како и над 12-годишна возраст со хронични заболувања. Повеќе од 80 проценти од турските наставници досега се вакцинирани со најмалку една доза вакцина против ковид-19, а повеќе од 70 проценти се ре-имунизирани.

Романија

Учебната година во Романија ќе започне со физичко присуство на 13 септември, рече министерот за образование Сорин Кампјану. Лекциите ќе се изведуваат лично до ниво на заболени од 6 на 1.000 жители.

Родителите ќе добијат формулари во кои ќе можат да се согласат или да не се согласат со вакцинација на деца над 12-годишна возраст. Романија започна да вакцинира деца на возраст од 12 години и постари против ковид-19 на почетокот на јуни.

Албанија

Албанија го одложи почетокот на учебната година и ќе започне на 27 септември наместо на 13 септември, изјави министерот за образование, спорт и млади, Евис Куши. Одложувањето има за цел „да ги пополни празнините предизвикани од обуката за време на пандемијата“ преку обезбедување дополнителна обука.

Поради оваа причина, периодот на дополнителна обука ќе започне на 1 септември, за време на кој од учениците нема да се бара да одат на училиште секој ден, но наставниците и целиот училиштен персонал ќе мора да бидат достапни во редовните училишта.

Албанскиот премиер Еди Рама, пак, предупреди дека земјата може да воведе задолжителни вакцини против ковид-19 за универзитетски професори и студенти.

Бугарија

Министерството за образование и наука на Бугарија одлучи дека на 15 септември училишната година ќе започне со физичко присуство дури и во „црвеното сценарио“, но не за сите деца.

Оттаму велат дека се направени неколку промени во можните сценарија за учениците. Досега, планот предвидуваше „жолто“ сценарио за учениците да учат преку Интернет доколку има 15% болни деца и наставници. Сега овој процент е намален на 10.