НОВ УДАР ВРЗ БУЏЕТОТ НА БАРСЕЛОНА Ла Лига ѝ го намалува таванот за плати

Барселона ќе има понизок таван за плати за новите играчи, објави во средата Ла Лига.

Организацијата која го администрира шпанското фудбалско првенство соопшти дека неодамнешниот преглед на сметководствените податоци на Каталонците покажал дека постои несовпаѓање што произлегува од одлуката на претходниот ревизор да вклучи трансакција вредна 100 милиони евра.

Во стариот извештај се споменуваше продажбата на ВИП-ложи на новиот стадион „Камп Ноу“ во изградба, преку кои Барселона успеа да ги покрие правилата за финансиски фер-плеј и со тоа успеа да ги регистрира Дани Олмо и Пау Виктор.

Ла Лига најави дека ќе поднесе тужба против ревизорот кој го одобрил овој запис, бидејќи сегашниот ревизор не се согласува со одлуката. Како причина, актуелниот ревизор го посочува фактот што наведените ВИП-ложи сè уште не постојат, па се уште не можат да се евидентираат како имот на клубот. Во таква ситуација Барселона не би имала право да ги регистрира Олмо и Виктор.

– Ова е обид да се наруши имиџот на клубот и е против интересите на Барселона. Секако, клубот ќе ги бара своите права преку правни средства откако детално ќе го прочитаме мислењето на Ла Лига – одговори претседателот на Барселона, Жоан Лапорта.

Барселона со години има проблеми со балансирањето на буџетот. Поради оваа причина, Каталонците не можеа да ги пријават Олмо и Виктор за учество во есенската сезона од шпанскиот шампионат. Во составот беа вклучени дури во јануари, кога со извештајот на претходниот клупски ревизор беше одобрена продажбата на ВИП-ложите, а во случајот се вмеша и шпанскиот суд. Сепак, неговата одлука не беше конечна и следната недела се очекува нова.