НИКОЈ НЕ Е ВЕНЧАН СО ФУНКЦИЈАТА АМА ОСТАВКИТЕ ЌЕ ПОЧЕКААТ Изборите му ја мрсат одлуката на Заев

Сите треба да учиме од слабостите на системот, трагедиите да ги прифаќаме со најобјективни согледувања, претпоставки и одговорности. Никој не е венчан, ниту врзан за функцијата. Секој е заменилив, но истовремено, не смееме ни да се поставуваме несоодветно поради некакви скриени политички побуди или други скриени намери, рече денеска премиерот Зоран Заев, одговарајќи на новинарско прашање кога ќе донесе одлука за понудената оставка на министерот Венко Филипче.

Според него, чувството за морална одговорност е разбудено, но не може да се распушти државата кога се случуваат несреќи.

Заев повтори дека ќе ги чека наодите од вештачењето и форензичките извештаи, вклучително и германските, кои треба да бидат комплетирани многу скоро и дека потоа ќе ја донесе одлуката.

Постапката, дополни тој, е во Јавното обвинителство.

– Јас само можам да упатам апел, тоа што граѓаните го бараат, постапката професионално и експертски целосно да се заврши и колку што е можно побрзо. Граѓаните заслужуваат одговори. Кога ќе бидат соопштени наодите од вештачењето и од форензиката, тогаш ќе го кажам и моето размислување по повод поднесените оставки од министерот, заменик министерот, директорот и економскиот директор на болницата – рече премиерот.

Тој го поздрави нивниот, како што рече, етички чин.

– Не можеме да ја распуштиме државата кога се случуваат несреќи. Тагата е голема, болката е присутна кај сите. Сите сме од крв и од месо, но трагедии се случуваат секаде. Многу е важно да се знае дека поради политички агенди и пориви, не треба никој ништо да прави, а поради етички, тоа е лично чувство и може да преземат одредени чекори тие што така мислат. Пред сè, важно е дали системот е добро поставен, кои биле неговите слабости и од нив треба да учиме, да не дозволиме да се случуваат други вакви трагедии – рече Заев.

Од трагедијата во Тетово, потенцира тој, веќе се извлечени поуки. Се прават дополнителни контроли на модуларните болници и на комплетниот здравствен систем.

– Веројатно долг период пред нас ќе биде со сериозен мониторинг. Модуларните болници се решение секаде и ќе бидат уште долго, сè додека трае пандемијата. Но, сите треба да учиме од слабостите на системот, трагедиите да ги прифаќаме со најобјективни согледувања, претпоставки и одговорности. Никој не е венчан за функцијата, ниту е врзан или е наследена од татко му. Секој е заменлив, но истовремено, не смееме ни да се поставуваме несоодветно поради некакви скриени политички побуди или други скриени намери. Треба чесно, отворено и транспарентно да дискутираме. Затоа, многу малку зборувам за деталите, за да оставам стручните луѓе, професионалците, експертите да ги кажат причините. Тоа го чека нашиот народ, тоа сите го очекуваме, а потоа и согласно тоа ќе ги влечеме потезите и ќе ги носиме одлуките – вели Заев.

Тој рече и дека се води грижа како се постапува за време на избори.

– Не смеете да разрешувате или решение да потпишете. Не смеете да именувате. Изборниот законик е јасен и соодветно се прават чекорите. Ако мислите дека треба целата Влада, Парламентот, здравствените институции да се распуштат, да дадат оставка, нека се побара тоа, но тоа на изборите луѓето секогаш можат да го кажат. Јас сум одговорен човек и сме знаеле многу често да прифатиме одговорност, затоа и отидовме на избори по францускиот потег, но добивме чест да ја водиме државата. Функциите се, пред сè, одговорност, да бидеме луѓе, да бидеме чесни граѓани и да ги следиме примерите на најсовремените демократски земји – истакна премиерот.