НЕРАБОТЕЊЕТО НА ПРЕВОЗНИЦИТЕ Е СЕРИОЗНА ЗАКАНА ЗА РЕГИОНАЛНИТЕ ЕКОНОМИИ Николоски и Буриловиќ договараа зголемена економска соработка меѓу Македонија и Хрватска
Се надевам дека ЕУ ќе најде решение, со цел професионалните возачи да не се третираат како туристи или мигранти, за да можат да ја вршат својата работа. Сè различно од ова ќе значи сериозен удар, не само за македонската и регионална економија, туку и врз економијата во цела Европа, вело министерот за транспорт Александар Николоски по средбата со претседател на Стопанската комора на Хрватска, Лука Буриловиќ.
Транспортниот сектор ја има клучната улога во развојот на регионалната економија и секое ограничување на работењето на превозниците ќе има негативно влијание врз целиот регион во Западен Блакан, потенцира вицепремиерот и министер за транспорт Александар Николоски, кој во рамки на работната посета на Загреб се сретна со Лука Буриловиќ, претседател на Стопанската комора на Хрватска.
Николоски укажа дека состојбата со превозниците претставува сериозна закана за економската стабилност и развој, информира Министерството за транспорт.
– Зборувавме за големиот проблем што го засега целиот регион, а се однесува за превозниците. Информирав за состојбата за Македонија и регионот и се надевам дека ЕУ ќе најде решение, со цел да не се третираат професионалните возачи како туристи или мигранти, да се третираат како професионалци и на тој начин да можат да ја вршат својата работа. Сè различно од ова ќе значи сериозен удар, не само за македонската и регионална економија, туку и врз економијата во цела Европа, имајќи предвид дека бројни компании се извозно ориентирани и извезуваат, а исто така и бројни компании во рамки на ЕУ ги користат нашите производи. Апелирам уште еднаш и го подржувам протестот на превозниците, ова прашање да се реши што поскоро и од 10 април да немаме проблеми за превозниците – изјави вицепремиерот Николоски по средбата.
Како што соопштуваат од Министерството за транспорт, на средбата се разговарало и за зголемување на трговската размена и за поголема соработка меѓу компании од двете земји.
– Се надевам дека трговската размена ќе расте, се надевам дека ќе достигнеме до половина милијарда евра, а во перспектива да таргетираме и до 1 милијарда евра размена – изјави министерот Николоски.
Претседателот на Стопанската комора на Хрватска, Лука Буриловиќ, истакна дека добрата економска соработка бележи околу 330 милиони евра.
– Имавме доста теми на кои разговаравме. Има голем потенцијал за развој и треба директно да соработуваме за да ја подигнеме оваа размена. Секако, значајна е инфраструктурата која доста се работи во Македонија, а и ние сме во замав. Зборуваме и за развој на железничката инфраструктура која во Хрватска е во подем и секако постои голем потенцијал за соработка меѓу нашите и македонските компании – изјави Буриловиќ.