„НЕМА ИЗМАМА, БАРАА ОД МЕНЕ ДА ПОМОГНАМ ЗА ОЛИМПИЈАДАТА“ Онишченко вели дека не измамил никого за пасошот
Човекот којшто е на црната листа на САД за Слободен печат тврди дека нема ништо спорно во постапката во која добил македонски пасош.
„Нема измама, ниту еден грам“, изјавил за Слободен печат украинскиот бизнисен Олекснандр Онишченко, откако Владата по аферата дека добил македонско државјанство иако бил на црна листа на САД почна постапка за одземање на македонското државјанство.
– Не знам што да кажам. Побараа од мене да ја претставувам Македонија и да помогнам во подготовката за Олимписките игри. Ако не сакаат, јас ќе го направам тоа на мој начин. Федерацијата побара од мене, Лука Заложник ме прашуваше секој ден. Ги дадов сите официјални документи при апликацијата – рекол Онишченко.
Македонскиот натпреварувач Лука Заложник, кого што го спомнува Онишченко, имаше одличен настап на Светските игри во коњички спортови. Тоа е пандан на светските првенства во другите спортови.
Заложник е Словенец по потекло и македонски државјанин е од мај 2015 година, има 34 години и бројни настапи на меѓународната сцена.
Откако изби големиот скандал, Владата одржа затворена седница на којашто директорот на Агенцијата за национална безбедност, Виктор Димовски, реферираше за случајот и покрена барање за одземање на државјанство на Онишченко.
Во АНБ се води истрага за случајот, а двајца вработени во Агенцијата веќе се суспендирани.
Новинарот Горан Момировски тврди дека Онишченко се занимава со трговија со гас и дека тоа е вистинската причина поради која добил македонски пасош.