НЕМА ХАРТИЈА, НЕМА ТОНЕРИ, НЕМА ПОШТА Интензивни подготовки за воведување е-фактура

Управата за јавни приходи соопшти дека во тек се интезивни подготовки за имплементација на проектот е-фактура.

Вчера во просториите на УЈП се одржа состанок со претставници од неколку ИТ компании кои развиваат софтвери за поддршка на работењето на домашните фирми во делот на изготвување на фактури.

На состанокот се дискутираше за нивните перцепции и прашања во врска со импликациите што ќе произлезат од прилагодувањето на софтверите кај домашните фирми заради воведувањето на е-фактура.

„ИТ компаниите ја препознаваат е-фактурата не само како алатка за намалување на даночната евазија, туку и како алатка која ќе има додадена вредност за фирмите. Нема хартија, нема тонери, нема вреќи со фактури по пошта, нема носење фактури на сметководители. Воедно, подготвени се активно да соработуваат со УЈП, да ги споделат своите искуства, да дадат придонес во тестирањето и сл.“, се наведува во соопштението од УЈП.

Управата за јавни приходи планира да го развива и тестира системот е-фактура во 2025 година.

УЈП го најави проектот е-фактура како дел од реформите кои се планираат во работењето на даночната управа. 

Со ова како што беше најавено, ќе се олесни деловното работење на компаниите, а од аспект на даночниот процес овој систем ќе обезбеди податоците  оданочивите промети да доаѓаат до УЈП во реално време и да има точно пресметани даночни обврски.