НЕМА ДА СЕ ПОВТОРИ СЦЕНАРИОТО СО ДАНЕЛА АРСОВСКА Ќе ја исполниме агендата на скопјани, не на поединци, порача Мециновиќ

Левица бележи значителен раст на поддршката по првиот изборен круг и левиот гласачки спектар цврсто се обединува околу нашата програма, изјави денеска кандидатот на Левица за градоначалник на Скопје, Амар Мециновиќ.

– Во изминатите неколку дена гледаме голем прилив на нови поддржувачи. Многу граѓани кои досега не гласале за Левица, сега ја гледаат како најсоодветна опција во вториот круг – рече тој.

Мециновиќ рече дека Левица ќе ја преземе улогата на обединувачка сила на сите антивладини гласови во Скопје.

– Нашата улога како обединувачка сила е очигледна, и тоа е одговорност, но и привилегија. Испишуваме нови страници во политичката историја на Македонија – рече Мециновиќ.

Тој најави дека Левица е во разговори со неколку независни листи за можна соработка во Градскиот совет. Како што истакна, со дел од независните листи, како Зелен хуман град, веќе имале заеднички ставови и гласања во претходниот мандат.

– Верувам дека и овојпат можеме да најдеме заеднички точки на интерес –  изјави тој.

Моменталната политичка ситуација Мециновиќ ја оцени како мобилизација против владината политика.

– Владата ја злоупотребува кризата со отпадот во Скопје. Владата сакаше до крај да ги истроши скопјани, за потоа да прави театар со нивното здравје. Тоа е доказ дека имаме деструктивна власт – рече тој.

Кандидатот на Левица порача дека партијата во следниот период ќе понуди алтернатива која ќе биде проактивна и фокусирана на интересите на граѓаните, а не на лични агенди.

– Не сакаме повторно да се повтори сценариото со градоначалничката Данела Арсовска. Ние сме тука да ја исполнуваме агендата на скопјани, не на поединци – истакна тој.

Мециновиќ најави и конкретни потези веднаш по преземањето на градската власт, како раскинување на сите штетни договори што ја оптоваруваат градската администрација и јавните претпријатија „уште во првите 72 часа“. Исто така, нагласи дека во првите 72 часа ќе го раскинат договорот со кој казината и обложувалниците се рекламираат на автобусите.

– Тоа веќе не смее да биде така. Градската власт не смее да дозволува промовирање на корозивни општествени процеси на својот имот – објасни Мециновиќ и додаде дека со ваква одлука ќе се подобри и финансиската состојба на Јавното сообраќајно претпријатие.

– Најатрактивниот рекламен простор во градот ќе биде вратен под стопанисување на јавното претпријатие, а не на приватни маркетинг агенции кои му оставаат само трошки – рече Мециновиќ.

Во делот на културата, Мециновиќ најави две нови насоки во политиката на градот за поддршка на младите: финансиско зајакнување на Младинскиот културен центар (МКЦ) и основање на скопски графити фестивал.

– Сакаме да му дадеме поголема финансиска поддршка на МКЦ. Дел од неговите простории може да се претворат во Скопско рок школо, простор каде младите ќе имаат пристап до инструменти и ќе можат да вежбаат и да се усовршуваат – објасни тој, додавајќи дека проектот ќе биде по примерот на слични иницијативи во европските градови.

Мециновиќ најави и идеја за нов фестивал.

– Ќе поддржиме формирање на Скопски графити фестивал, по примерот на градови како Мостар. Секоја пролет ќе каниме уметници од регионот и од светот да создаваат мурали и графити, со што ќе го разубавиме Скопје и ќе му дадеме нов визуелен идентитет – рече тој.

Според него, ваквите иницијативи ќе придонесат за поголема активност на младите во културниот живот и ќе го направат градот попривлечен за домашни и странски посетители.

Мециновиќ најави дека во следните 10 дена партијата ќе одржува тематски прес-конференции на кои ќе ги претставува дополнителните идеи и мерки за Скопје.

– Нашите активисти се деноноќно на терен. Секојдневно комуницираме со граѓаните и ја артикулираме пораката на најдобар можен начин – рече тој.

– Очекувам значително зголемување на поддршката во вториот круг – рече кандидатот на Левица за градоначалник на Скопје, Амар Мециновиќ.