НЕИЗВЕСНОСТ ДО ПОСЛЕДЕН МОМЕНТ Скопјани сѐ уште не знаaт дали ќе има забава на Плоштад и кој ќе пее
Засега само Елена Ристевска потврди дека ќе пее за новогодишната ноќ во центарот на Скопје, а според информациите со неа ќе пејат и други домашни изведувачи.
Скопјани на ден пред новогодишната ноќ сѐ уште не знаат кој ќе ги забавува на плоштадот „Македонија“, дали ќе има огранизиран дочек, бидејќи нема ниту трага, ниту глас од градоначалничката Данела Арсовска, иако пред можеби две-три недели најави спацијална прес-конференција токму за оваа цел, но таа никогаш не се одржа.
До медиумите пристигна покана за прес-конференција која беше закажана за вчера од здружението на естрадни уметници „Естрада“ кое заедно со компанијата СЛС ја организира Новогодишната прослава на плоштадот Македонија во Скопје, на која ќе соопштат сите детали за овој настан, но ниту имаше прес-конференција, ниту соопштение за јавноста.
Засега само Елена Ристевска потврди дека ќе пее за новогодишната ноќ во центарот на Скопје, а според сознанијата со неа ќе пејат и други домашни изведувачи.
Претседателот на Здружението на естрадни уметници „Естрада“, Горјан Стојановски во изјава за Вечер рече дека музичарите годинава ќе им приредат на скопјани забава за пречекот Новата година на Градскиот плоштад, поради тоа што на неколку дена пред најлудата ноќ, Град Скопје нема никакви планови за новогодишната програма.
– Бидејќи видовме дека Град Скопје не организира прослава за новогодишната ноќ, решивме ние тоа да го направиме заедно со компанијата „СЛС“ – изјави Стојановски за весникот Вечер.
Тој најави дека програмата ќе започне во 20.30 часот со групата „South Park“ која ќе настапи со странска музика за сите вкусови. При тоа, ќе изведат и нова, но и ретро музика. Во 21.30 часот ќе може да се проследи настапот на поп дуо бенд „Дупер“ кои ќе настапат со македонска авторка музика. По нив настап ќе има Ристо Самарџиев.
Атмосферата ќе се вжешти со настапот на мераклиите од „Мерак меана“ кој е предвиден за во 22 часот. Ќе пеат: Наум Петрески, Благица Павловска, Ферус Мустафов, Зуица Лазова, Ленче и Горан Кукиќ и други. По нив повторно ќе настапи Ристо Самарџиев.
Забавата со почеток во 23.30 часот ќе ја заокружи Елена Ристеска, која својот настап за новогодишниот пречек на плоштадот „Македонија“ го најави на Инстаграм. Елена ќе ги забавува скопјани се до 12.30 часот, по што ќе следи DJ APO.