„НЕ Е ВИНОВНА БЕХТЕЛ ШТО ТАЧЕ ИМА ЛЕПЛИВО РАЧЕ“ Римувана реплика на ВМРО-ДПМНЕ до СДСМ

ВМРО-ДПМНЕ со соопштение реплицираше на соопштение на СДСМ во кое оваа партија оцени дека нападите врз договорот за реализација на Коридорите 8 и 10д значат обвинување на реномираната американска компанија Бехтел за криминал.

ВМРО-ДПМНЕ во одговорот вели дека СДСМ, „и кога е фатен жив како краде, не престанува да лаже“.

„Тие велат дека ВМРО-ДПМНЕ ја напаѓа Бехтел. Вистината е дека криминалот е кај владата. Секој приватен субјект, фирма се бори да добие максимум во преговорите, но криминалот е што државата застапувана од Владата, Ковачевски и Груби ја ставија земјава во подредена состојба и прифатија да исплаќаат милиони како пенали и трошоци на приватен субјект.

Криминалот е во тоа што крими тандемот Ковачевски и Груби прифатиле да ги зголемат работните часови, а во спротивно ќе исплаќаат од државниот буџет милиони евра на приватна компанија. Воедно го изедначиле безаконието и важењето на законите преку тоа што во процесот на експропријација се изедначуваат дивоградбата и легалните објекти кои ќе бидат обештетувани по иста цена.

Очигледно е дека Ковачевски фатен жив како краде има потреба да вклучува и влади на други држави само за да се оправда. Не е крива Бехтел и Енка што премиерот Таче има лепливо раче“ – се вели во одговорот од ВМРО-ДПМНЕ.