НЕ БИ САКАЛ ДА ШПЕКУЛИРАМ ЗА ЛОКАЦИЈАТА НА ГРУБИ Тошковски вели дека истрагата е во тек

Министерот за внатрешни работи Панче Тошковски вели дека не би сакал да шпекулира за локацијата на поранешниот вицепремиер Артан Груби кој избега од државата. Коментирајќи ги наводите на актуелниот вицепремиер Изет Меџити дека Груби се наоѓа во Албанија Тошковски изјави дека „битно е дека спроведена е истрага против службеникот од гранична контрола којшто сторил кардинална грешка при неговото постапување и за истиот е донесено решение за суспензија и поднесена е кривична пријава за несовесно работење во служба“.

– Не би сакал да шпекулирам каде се наоѓа Артан Груби. Битно е дека е распишана меѓународна потерница по лицето кое имаше голем број на изјави во медиумите дека чист е како солза и дека нема сторено никакво кривично дело. Добро е, ако е така, да се врати во Македонија, да се соочи со сите оние обвинувања кои што како такви ги доставивме до Јавното обвинителство, кое отвори истрага и добро е да секој еден којшто е соочен со лицето на правдата да го докаже тоа во содветна процесна постапка – рече министерот во гостување на ТВ Сител.

Тошковски отрки дека се вршат одредени разговори, дека се одземени мобилни телефони, но дека во моментот не смее да споделува детали од истрагата.

– Во однос на директната вина што предизвикала ваква штетна последица, за лице на стоп листа, кое не било задржано и не биле известени органите, кривична пријава е поднесено против службеникот којшто работил во рамки на граничната полиција. Во однос на сè останато поврзано со одредени сомненија дека не станувa збор за несовесно работење во служба, туку друг тип на кривично дело, во овој момент не би сакал да говорам во детали, би ве пренасочил во рамки на Јавното обвинителство, бидејќи тоа е тоа по кое ние постапуваме по директна наредба. Одземени се мобилни телефони, се вршат одредени разговори, во овој момент не би сакал да споделувам повеќе детали.

Според Тошковски, добро е што Демократската унија за интеграција (ДУИ) се огради од „бегалецот од правдата“.

– Се надевам дека во иднина ќе се оградуваат од сите оние бегалци од правдата, ако ги има такви, кои што наместо да се соочат со она кое што душмански го краделе македонскиот народ во минатото, соодветно во рамки на една процесна правда, ги охрабрувам да се оградуваат од сите оние потенцијални криминалци за кои што во соодветна постапка треба да се докаже дека душмански го краделе македонскиот народ, но лошо е кога се обидуваат да ја манипулираат јавноста – рече Тошковски.