НАУЧНИЦИТЕ СО ДОБРИ ВЕСТИ Промена на исхраната може да го продолжи животот за 13 години
Истражувањето се фокусира врз стекнатите навики на хранење и со оптимизација на истите се нагласува дека може да се продолжи човековиот живот.
Промената на вашата исхрана може да ви го продолжи животот до 13 години, според неодамна објавеното истражување спроведено од група на автори од Универзитетот Берген во Норвешка.
Студијата користела модел за да испита што би можело да се случи со долговечноста на мажот или жената доколку ја заменат „типичната западна диета“ фокусирана на црвено месо и преработена храна со „оптимизирана диета“ фокусирана на помалку консумирање црвено и преработено месо и консумирање повеќе овошје, зеленчук, мешунки, цели зрна и јаткасти плодови.
Ако жената почне да јаде оптимално на 20-годишна возраст, би можела да го продолжи својот животен век за нешто повеќе од 10 години, според студијата објавена во списанието PLOS Medicine.
Ако мажот би се хранел поздраво од својата 20-та година, би можел да си го продолжи животот за 13 години.
Фокусирањето на поздрава исхрана исто така може да го продолжи животот на постарите луѓе, се вели во студијата. Почнувајќи од 60-годишна возраст, жената може да го продолжи својот животен век за осум години. Мажите кои почнуваат поздрава исхрана на 60-годишна возраст би можеле да го продолжат животниот век за речиси девет години.
Диетата базирана на растенија може да им користи дури и на 80-годишниците, вели студијата, мажите и жените би можеле да го продолжат животот за околу 3,5 години доколку воведат промени во исхраната.
– Погледот дека подобрувањето на квалитетот на исхраната ќе го намали ризикот од хронични болести и прерана смрт е одамна воспоставено, а помалку хронични болести и прерана смрт значат подолг животен век – рече д-р Дејвид Кац, специјалист за превентивна медицина кој беше вклучен во учењето.