ПОЛСКА И РОМАНИЈА ЌЕ СОБОРУВААТ РУСКИ ЛЕТАЛА? „НАТО треба да го заклучи небото“
Одбраната на воздушниот простор над Украина, од страна на Полска и на Романија, не треба да се отфрли на долг рок, изјави германскиот политичар Антон Хофрајтер.
Германски политичари сугерираа дека руските ракети и дронови, чија цел се енергетската инфраструктура и воените инсталации на Украина, може да бидат соборени од територијата на соседните Полска и Романија, пишува Еуромајдан прес.
Според шефот на кабинетот на министерот за одбрана на Германија, Нико Ланге, тоа би довело до создавање безбедна зона, широка 70 километри, на границата меѓу ЕУ и Украина, а во исто време би му овозможило на Киев да прераспореди сопствени системи за противвоздушна одбрана.
– Одбраната на воздушниот простор над Украина, од страна на Полска и на Романија, не треба да се отфрли на долг рок – изјави германскиот политичар Антон Хофрајтер.
Ваквиот потег во моментов не е предмет на дебата бидејќи моменталниот приоритет на Западот е да ѝ обезбеди на Украина значително поголемо количество оружје и муниција.
Либералот Маркус Фабер, чија партија е исто така членка на владејачката коалиција, се согласи дека „воздушниот простор над пограничните региони на Украина може да биде заштитен со воздушна одбрана на територијата на НАТО“. Според него, тоа би било можно само доколку Западот може да обезбеди доволно муниција за овие одбранбени системи.
Пратеникот на опозициската Христијанско-демократска унија (ЦДУ), Родерих Кисеветер, оценува дека западните поддржувачи на Киев би можеле да соборат руски беспилотни летала над Украина.
– Ова ќе ја олесни воздушната одбрана на Киев и ќе им овозможи да го заштитат фронтот – објасни тој.