Народната банка ја задржа основната каматна стапка на ниво од 1,25 отсто

Основната каматна стапка се задржува на нивото од 1,25 отсто, одлучи Комитетот за оперативна монетарна политика на Народната банка на последната седница.

Оценка на Комитетот е дека постојното ниво на каматната стапка е соодветно на тековните економски и финансиски услови.

-Намалувањето на основната каматна стапка до нивото од 1,25%, како и досегашното позначително намалување на понудениот износ на благајнички записи придонесоа за натамошно зголемување на ликвидноста на банкарскиот систем и поддршка на кредитните текови во економија. На седницата беше оценето дека ослободената ликвидност изминатата година од вкупно 15 милијарди денари преку основниот инструмент на Народната банка е соодветна, при што се одлучи на аукцијата што ќе се одржи денес да се понудат благајнички записи во непроменет износ од 10 милијарди денари – велат од Народна банка.

Во однос на економската активност за периодот јануари ‒ февруари 2021 година, Комитетот оцени дека продолжуваат ефектите  од здравствената криза врз економијата кои  може да се поврзат и со појавата на третиот бран на ковид-19, што предизвикува натамошна воздржаност на економските субјекти, одразувајќи се и врз динамиката на економското закрепнување.

Во однос на инфлациските движења, во периодот јануари ‒ март 2021 година, ценовните промени се во согласност со очекувањата според последната проекција на Народната банка.

– Сепак, нагорните ревизии на надворешните влезни претпоставки упатуваат на умерено нагорни ризици за проекцијата на инфлацијата за 2021 година од 1,5%. Притоа, и натаму е нагласена неизвесноста од движењето на светските цени на примарните производи во следниот период, согласно со неизвесните економски ефекти поврзани со пандемијата и изгледите за справување со неа – велат од НБ.

Девизните резерви и понатаму се на соодветно ниво и се одржуваат во сигурната зона.

– Во рамките на монетарниот сектор, согласно со првичните податоци за март 2021 година, продолжува зголемувањето и на депозитите и на кредитите, при што годишниот раст на депозитите е над проектираниот за првиот квартал на 2021 година, додека кредитниот раст е во рамките на проекциите – посочуваат од НБ.

Во периодот помеѓу двете седници на Комитетот, ликвидноста на банкарскиот систем во денари се задржа на релативно солидно ниво, за што потврда е и отсуството на потреба кај банките за тргување на пазарите на пари.

– Движењата на домашните финансиски пазари упатуваат на умерено подобрување на очекувањата на економските субјекти, видливо преку зголемената нето-понуда на девизи од физичките лица на менувачкиот и девизниот пазар на нивоа блиску до нето-понудата пред почетокот на здравствената криза – велат од Централната банка.

Општо земено, на седницата на Комитетот беше заклучено дека движењата кај основните макроекономски параметри и натаму се поволни и без поголеми отстапувања во однос на очекувањата, кога сѐ уште постојат неизвесност и ризици од пандемијата предизвикана од ковид-19.