MЗ ги демантира лажните информации објавени за набавка на вакцината „Спутник V“
Од министерството велат дека набавката на вакцината од самиот почеток се одвива со директна комуникација со Рускиот инвестициски фонд во Москва.
Министерството за здравство во целост ги демантира лагите и дезинформациите објавени на неколку медиуми дека Република Северна Македонија преку „посредник – српски државјанин“, ја набавила вакцината против ковид-19, „Спутник V“ производство на рускиот Центар „Гамалеја“.
– Министерството за здравство ја информира јавноста дека набавката на вакцината „Спутник V“ од самиот почеток се одвива во директна комуникација со Рускиот инвестициски фонд во Москва и нема никаков посредник во комуникацијата. Првите 3.000 дози вакцини веднаш пристигнаа откако МЗ го потпиша договорот за набавка на 200.000 вакцини од проиводителот на вакцината „Спутник V“ – се вели во демантот од МЗ.
Оттаму додаваат дека за набавка на вакцини против ковид-19, без разлика дали станува збор за „Спутник V“, „Синофарм“, „АстраЗенека“ или „Фајзер“, или Ковакс механизмот, нашата држава ја плаќа цената на вакцината понудена од производителот.
– Министерството за здравство уште еднаш потенцира дека нема провизии за ниту една набавка на вакцини против ковид-19. Ваквите лажни вести имаат за цел намерно да го нарушат процесот на набавки на вакцини. Министеретсвото за здравство ја цени и поддржува слободата на медиумите, истражувачкото и критичко новинарство, но укажуваме информациите до кои доаѓаат медиумите сериозно да ги проверуваат, како би се избегнало ширење на лажни вести – стои во демантот.