МВР за хаосот пред Градската болница: Двајца се повредени во вооружена пресметка во селото Љубош

МВР пред малку информира дека во Градската болница во Скопје, околу 13 часот биле донесени двајца повредени во вооружена пресметка во која учествувале уште две лица, а се случила во селото Љубош. Токму тоа било причината за метежот пред болницата кога возило марка голф, како што објавивме претодно, влетало во дворот на објектот и за зголеменото присуството на полицијата пред болницата.

„Денеска во 13.04 часот во СВР Скопје било пријавено дека пред деловен објект во с.Љубош бил нарушен јавниот ред и мир помеѓу К.Н. и К.Х., од една страна и Н.Р. и М.Р., од друга, при што било употребено и огнено оружје. Притоа со повреди се здобиле К.Н. и М.Р., кои биле пренесени во Градската општа болница „Св.Наум Охридски“ за укажување на лекарска помош. Четирите лица се обезбедени, како и нивните возила и оружјето, а по целосно расчистување и документирање на случајот ќе биде поднесен соодветен поднесок“, се вели во официјалната верзија на инцидентот.