МВР апелира граѓаните да не користат петарди за празниците
Според МВР зависно од законот казните се од 200 до 500 евра за нарушување јавен ред и мир, и од 3 до 10 години затвор според кривичниот законик за изработка и продажба на вакви материјали.
Министерството за внатрешни работи и годинава спроведува превентивна кампања за укажување на можните последици од употребата на петарди и други пиротехнички средства, посебно актуелна пред и за време на новогодишните и божиќните празници.
МВР потсетува и на законските одредби во кои е санкционирана употребата на пиротехнички средства и нивната нелегална продажба.
– Законот за прекршоци против јавниот ред и мир во член 31 предвидува глоба во износ од 200 до 500 евра во денарска противвредност за оној кој неовластено пука од огнено оружје, употребува пиротехнички средства или сличен експлозивен или лесно запалив материјал, или на сличен начин го нарушува мирот и безбедноста на граѓаните – велат од МВР:
Согласно Кривичниот законик, додаваат оттаму, во член 396 е предвидено недозволеното изработување, држење и тргување со оружје или распрскувачки материи, при што тој кој што неовластено изработува, држи, продава, набавува или врши размена со огнено оружје, муниција или експлозивни материи, ќе се казни со затвор од 3 до 10 години, а ако предмет на делото од ставот 1 е поголемо количество на огнено оружје, муниција или експлозивни материи, или огнено оружје, муниција или експлозивни материи кои на граѓаните им се забранети, сторителот ќе се казни со најмалку 5 години затвор.