Муцунски: Секоја недела има застрашувачки скандали, имаме систем во кој нема „р“ од реформа

Тимчо Муцунски, пратеник од ВМРО-ДПМНЕ на гостувањето во емисијата „Што не е јасно“ на телевизија Алфа говореше за корупциските скандали на актуелната власт.

– Навистина е загрижувачки тоа што се случува секојдневно, и ние ако следиме веќе месеци наназад јас би рекол на секоја недела има некој ваков вид на застрашувачки скандал во нашето општество. Корупција од највисоко политичко ниво и постојано истите луѓе ги гледаме дека се вмешани. А, од власта, од истражните органи, од тие што имаат одговорност да се борат против високата корупција има само молк – рече Муцунски.

Според Муцунски, најголемиот проблем е очигледната спрега помеѓу политичкото лидерство и системот на јавно обвинителство, правосудниот систем.

– Нашите граѓани не заслужуваат ваква власт. Гледаме дека се работело за суми од 250.000 евра, а вмешани се поединци поврзани високо во власта. Видовме дека МВР постапило за овој случај во време на Наќе Чулев, а СДСМ што правеле? Кинеле страници, менувале кривични пријави и Обвинителството треба да го истражи овој случај, ама и Обвинителството треба само да се истражи.  Затоа што гледаме дека има јавни обвинители кои ја злоупотребуваат службената положба, затоа младите заминуваат, треба да се избориме за реална, а не за фиктивна правда. Дополнително, обвинителството треба да даде одговор и за криминалот – рече Муцунски коментирајќи го последниот скандал со 250.000 евра за Вице Заев од РЕК Битола.

Според него, мора да се стави крај на грабежот на државата.

– Сега имаме систем во кој нема „р“ од реформа, нема ни еден капитален проект – кажа Муцунски.

Муцунски заклучи дека се потребни итни промени, бидејќи држава оди кон распад.