МОЖНО Е ДРЖАВАТА ДА ИМ ВРАТИ 50 МИЛИОНИ ЕВРА НА НАЈПРОФИТАБИЛНИТЕ КОМПАНИИ Ако судот го укине солидарниот данок, ќе мора да ги вратиме парите
Судството е независно, ако судот пресуди дека треба да се вратат парите, а тоа се 49 милиони евра, ние не можеме да избегаме од тоа, рече денеска министерката за финансии Гордана Димитриеска Кочоска, во врска со претстојната одлука на Уставниот суд за Законот за данок на солидарност.
Судството е независно, ако судот пресуди дека треба да се вратат парите, а тоа се 49 милиони евра, ние не можеме да избегаме од тоа, рече денеска министерката за финансии Гордана Димитриеска Кочоска, во врска со претстојната одлука на Уставниот суд за Законот за данок на солидарност. Судот во средата одлучи да ја преиспита уставноста и законитоста на Законот за солидарен данок и наскоро се очекува одлука со која овој закон ќе биде укинат или поништен. Ако биде поништен, државата ќе мора на фирмите да им ги врати парите што во 2023 година им ги собра на име на овој еднократен данок.
Мојот став во врска со солидарниот данок го знаете од времето кога се воведуваше и дека бевме против од многу причини, нагласи министерката Димитриеска Кочоска.
– Да ја почекаме одлуката на Уставниот суд. Наша должност, како Министерство за финансии, е да ги почитуваме и спроведуваме законите. Ако Судот пресуди дека треба да се вратат парите, ние не можеме да избегаме од тоа, ние имаме обврска да ги вратиме. Јас морам да го почитувам законот – изјави министерката Димитриеска Кочоска.
Прашана што би значело тоа за буџетот, со оглед дека 50 милиони евра не се малку пари, Димитриеска Кочоска, рече дека ова е резултатот од нестандардните политики на претходната влада.
– Ова се резултатот од незнаење што се прави. Во изминатите години за ова зборувавме. Ова е таа нестабилност што ја правеше претходната влада, играјќи со персоналниот данок, со данокот за солидарност и само имаме проблеми. Затоа и нема инвестиции. Затоа сега и правиме напори да ги охрабриме инвеститорите. Да им ветиме дека даночната политика е веќе стабилна и предвидлива – рече министерката за финансии.
Уставниот суд во средата изрази сомнеж дека оспорениот Закон ја повредува темелната вредност владеење на правото, како и правната сигурност на субјектите и правната предвидливост.
„Со овој закон е нарушена правната сигурност на компаниите што оствариле профит над 615.000.000 денари (10 милиони евра) во 2022 година, со тоа што во септември 2023 година им наложи задолжителен вонреден данок на солидарност на веќе одданочениот профит од претходната година. Уставните судии изразија сомнеж дека законот произведува повратно дејство и дека компаниите се ставени во нееднаква положба“, соопшто Уставниот суд по одлуката.
По седницата претседаелот на Уставниот суд Дарко Костадиновски рече дека одлуката за уставноста на Законот за данокот на солидарност се очекува на почетокот на следната година. Тој објасни дека укинувањето на овој закон ќе значи дека во иднина не може да се примени ниту да се донесе идентичен закон, а поништувањето подразбира да се поништат последиците кои настанале од укинатиот закон, односно, поништувачката одлука значи дека таков закон не ни постоел.