МНР ЗАПОЧНУВА ПРОЦЕС ЗА БЕЗВИЗЕН РЕЖИМ СО САД Процентот на одбиени визи од близу 30% треба да падне на 3%

Во врска со објавените податоци од страна на Стејт департментот дека процентот на одбиени визи за Северна Македонија во 2022 година изнесувал 26,29%, информираме дека Министерството за надворешни работи започна процес за присоединување на земјава кон Програмата за САД за безвизен режим (Visa Waiver Program) – информираат од МНР.

„Со одлука на Влада, формирана е меѓуресорска работна група предводена од Министерството за надворешни работи, која се состои од претставници и на други релевантни институции кои работат на исполнување на условите за воспоставување безвизен режим со САД. Условите се однесуваат на различни области, но еден од клучните е процентот на одбиени визи да изнесува најмногу 3%“ – стои во известувањето од МНР.

Според МНР, високиот процент на одбиени визи од безмалку 30% се должи на несоодветните апликации. Поради тоа, како што информираат, наскоро ќе почне кампања за едуцирање на граѓаните за процесот на аплицирање и условите кои треба да бидат исполнети, со цел добивање виза за САД.

„Процесот на укинување визи за влез на државјаните на Северна Македонија во САД е долгорочен и комплексен процес, што налага континуирани активности на што посветено работиме. Воедно, приклучувањето на Северна Македонија во Програмата за безвизен режим стана дел од Стратешкиот дијалог со САД и е меѓу проектите во Акцискиот план, што беше усвоен на владина седница во февруари оваа година. Постигнувањето на оваа цел ќе биде од бенефит за економскиот развој на земјава, а ќе внесе и дополнителен импулс за зајакнување на билатералните односи и стратешкото партнерство, како и доближувањето на народите од двете земји“ – стои во известувањето од МНР.

ТЕШКО ДО АМЕРИКАНСКА ВИЗА Одбиени над 25% од барањата од апликанти од Македонија