МЛАДИТЕ НА ЗНАМ ГО ОСНОВАА КЛУБОТ НА МЛАДИ Ние сме генерацијата што нема да ја напушти Македонија

На последниот ден од Летниот камп во Струга, петнаесет млади луѓе, претставници на општинските организации на Движењето ЗНАМ за Наша Македонија, ја потпишаа Иницијативата за формирање на Клуб на млади, соопштија од партијата.

Од ЗНАМ велат дека ова не е само нова организациска форма, туку почеток на „нова младинска политичка енергија што ќе ја движи Македонија напред“.

„Клубот ќе биде отворена платформа за секој млад човек, простор каде што секој ќе може да предложи своја идеја, визија и решение. Од тие идеи ќе произлезат политики што ќе ја градат иднината на нашата држава“, се наведува во соопштението.

Младите потписници на иницијативата порачаа дека токму нивната генерација ќе ја изгради иднината на земјата.

„Ние сме генерацијата што нема да ја напушти Македонија. Ние сме оние што ја сакаат, ја негуваат и ќе ја градат со срце и визија. Денес во Струга го поставивме темелот на младинската сила што ќе ја носи Македонија таму каде што заслужува, во кругот на модерните, праведни и европски држави“, велат од ЗНАМ.

Како дел од оваа иницијатива, најавена е подготовка на Декларација на младите, документ што ќе ја претставува нивната визија, вредности и цели за Македонија, и ќе биде патоказ за генерациите што доаѓаат.

Од ЗНАМ истакнуваат дека Клубот на млади ќе биде училиште за идеи и лидерство, глас на младината и двигател на промените.

„Оваа иницијатива е доказ дека љубовта кон татковината не е само збор, туку конкретно дело, заеднички пламен што ќе го осветли патот на Македонија кон иднината“, порачуваат младите на ЗНАМ.

Со ваквиот потег, додаваат од движењето, младите покажале дека Македонија има иднина силна, обединета и исполнета со надеж.