Милошоски: Поради аферата „Мафија“се ризикува безвизниот режим да биде ограничен или суспендиран
Ќе мора многу темелно и заеднички со ЕУ да се истражи случајот „Мафија“, сѐ со цел да не се загуби стекнатата привилегија за безвизно патување со македонски пасош во земјите на ЕУ.
Настрана од внатрешните политички импликации случајот „Мафија“, со издадени 215 македонски пасоши со лажен идентитет на меѓународни нарко – швецвери, на Македонија може да и создаде сериозни проблеми по однос на безвизниот режим кон земјите членки на ЕУ. Доколку нема сериозна истрага на Интерпол и ЕУ за овој скандал, се ризикува безвизниот режим да биде ограничен, или да биде суспендиран, пишува на Фејсбук пратеникот на ВМРО-ДПМНЕ Антонијо Милошоски.
Тој потсетува на реакцијата на Холандија која во мај 2019 годна побарала укинување на безвизниот режим за албанските пасоши со образложение дека „криминалните организации преку Албанија ја злоупотребуваат можноста да патуваат без визи низ Европа и ја шират мрежата за криумчарење“, за што холандскиот парламент усвоил и резолуција.
„Од сите 215 лажни пасоши кои македонското МВР ги издало на меѓународни нарко-босови во аферата „Мафија” може да се издвои оној со лажниот пасош на име Таќо Вурмо издаден на Waleed Issa Khamays, вториот човек на италијанската мафија Ндрангета, кој бил задолжен за логистика на пратките со кокаин од Бразил до Западна Европа. Овој нарко бос од 2017 година е еден од најбараните нарко-мафијаши од страна на Италија, но и од целата ЕУ, преку Интерпол. И додека вториот човек на мафијата во Италија, заради меѓународната потерница не смеел и не можел да влезе ни во Хрватска, ни во Србија, ни во Бугарија, успеал во јануари 2019 година да влезе во Македонија, а самиот негов влез во земјава отвара сериозна дилема за нефункционалниот систем на контрола на границите од страна на МВР. Со влезот во земјава и издавањето на македонски пасош на Waleed Issa Khamays, Македонија не само што им направила проблем на истражните органи во Италија, туку станала и сива зона за мафијашите по кои трага Интерпол“, пишува Милошоски.
Тој додава дека безвизниот режим за ЕУ е систем на ефикасна гранична контрола, високи стандарди и меѓусебна доверба. Во случајот на издадените 215 пасоши на меѓународни мафијаши Македонија потфрлија во граничната контрола и во взаемната доверба со членките на ЕУ. Затоа ќе мора многу темелно и заеднички со ЕУ да се истражи случајот „Мафија“, сѐ со цел да не се загуби стекнатата привилегија за безвизно патување со македонски пасош во земјите на ЕУ.