МИЛЕВСКИ ЈА НАПУШТА МИНИСТЕРСКАТА ФОТЕЛЈА Ќе си замине ли од ЛДП?
Ставот против францускиот предлог би можел да го чини сегашниот лидер на ЛДП политичка кариера.
Министерот за локална самоуправа и лидер на ЛДП, Горан Милевски наскоро има во план да се повлече од функцијата во владата, а исто така е неизвесна неговата позиција во партијата.
Плусинфо ја потврди веста која вчеравечер се појави во медиумите, а првото што ќе го стори Милевски е да си замине од владата на премиерот Ковачевски, каде го води министерството за локална самоуправа.
Кога станува збор за претседателската функција во партијата ЛДП, сѐ уште е неизвесно, а доколку одлучи да се повлече тоа ќе го стори во декември кога треба да се одржи Конгресот на партијата, но Милевски има сѐ уште време за размислување.
Како што е веќе познато претседателот на Либерално-демократската партија Горан Милевски во неговите јавно искажани ставови беше против францускиот предлог во однос на преговорите меѓу Македонија и Бугарија, но тој не доби поддршка од двајцата пратеници кои се дел од владејачкото мнозинство и во собранието гласаа за усвојување на предлогот.
Најголемите недоразбирања во ЛДП биле на релацијата Милевски и пратеничката Моника Зајкова, која важи за блиска до СДСМ.
Неофицијално, најсериозен кандидат за нов лидер на либералдемократите е потпретседателката Моника Зајкова, која е еден од двајцата пратеници на ЛДП, заедно со Боби Мојсоски.
ЛДП под водство на Милевски во неколку наврати беше блиску до целосно напуштање на коалицијата со СДСМ и приближување кон ВМРО-ДПМНЕ но тоа не се случи.